Vatslav Gavel vefatı munasebetinen Meclisniñ taziyesi

19 December 2011

Vatslav Gavelnıñ adı HH asırda bir çoq halqlar ve millionlarnen insanlarnı öz aqları ve munasip yaşayış içün küreşke ilhamlandırğan meşur insanperverler sırasında eñ parlaq simvol olaraq saqlanır

2011 senesi dekabr 18 künü Çehoslovakiyanıñ soñki,Çehiya Cumhuriyetiniñ birinci prezidenti Vatslav Gavel 75 yaşında vefat etti.

İnsaniyet demokratiya içün küreşken eñ cesür ve sebatlı, öz ömürinen serbestlikkke ıntıluv rejim hışımlarından da küçlü olğanını isbat etken adamnı ğayıp etti.

Onıñ 1989 senesi dekabr 29-dan 1992 senesi iyül 20-ge qadar Çehoslovakiya prezidenti ve 1993 senesi fevral 2-den 2003 senesi fevral 2-sine qadar Çehiya Cumhuriyeti Prezidenti sıfatında faaliyeti ahlâqnı devlet siyasetiniñ temeli olaraq tesis ete bilgen lider temsili oldı.

Vatslav Gavel Qırımğa qaytmaq ve aq-uquqlarını ğayrıdan tiklemek içün küreşken qırımtatar halqına daima göñüldeşlik bildirdi. 2011 senesi oktâbr ayında Qırımtatar halqı Meclisiniñ delegatsiyası Vatslav Gavelnıñ şahsiy daveti boyunca Pragada “Forum 2000” XV halqara konferentsiyasında iştirak etti.

Meclis reisi Mustafa Cemilevnen körüşüv devamında efsaneviy uquqqoruyıcı ve totalitar rejimden keçken devletlerde demokratik inkişafnıñ tarafdarı Vatslav Gavel Qırımtatar halqınıñ öz Vatanında aq-uquqlarını ğayrıdan tiklev ve Ukrainada onıñ telükesizligini ve inkişafını teminlev boyunca halqara forum keçirüv teşebbüsine qoltutıp, onıñ keçirilmesine yardım bermege azırlığını bildirdi.

Vatslav Gavelnıñ apshanelerde keçirgen yılları tabiiy ki onıñ sağlığına tesir etti. Nefes yolları hastalığına oğrağan Vatslav Gavel pek çoq yıllar devamında bronhitten çekişti.

Qırımtatar halqınıñ Meclisi Çehiyanıñ devlet erbabı, zamanımıznıñ büyük gumanisti ve seyyare miqyasında uquqqoruyıcı Vatslav Gavelnıñ vefatı munasebetinen onıñ vâqınları, soy-aqrabaları, dost-eşleri ve bütün çeh halqına teren taziye bildirip, baş sağlığı tiley.

Qırımtatar halqınıñ Meclisi

2011 senesi dekabr 18

Aqmescit ş. Qırım, Ukraina