Ali Hamzin Türkiye Cumhuriyetiniñ Odessadaki baş konsulı Huseyin Ergani ile körüşti

16 Dekabr 2011

2011 senesi Aqmescitte Qırımtatar halqı Meclisi tışqı alâqalar bölüginiñ başı Ali Hamzin Türkiye Cumhuriyetiniñ Odessadaki baş konsulı Huseyin Ergani ile körüşti.

TİKAnıñ Qırımdaki koordinatorı Ahmet Çinar da iştirak etken bu körüşüvniñ iştirakçileri sürgünlikten qaytqan qırımtatatarlarnıñ meselelerini muzakere ettiler.

Musafirlerniñ ricasına köre Ali Hamzin Bağçasaraydaki Hansaraynı YÜNESKO variyeti cedveline kirsetmek meselesini de açıqladı.

Onıñ ayrıca qayd etkenine köre, Ukraina, Qırım ükümetleri, Bağçasaray tarihiy-medeniy qoruq reberleri, ukrainalı ve qırımlı tarihçılarnıñ birlikteki areketleri, bunıñ kibi de Qırımtatar halqı Meclisiniñ böyle müim meseleniñ çeziminde bivasta iştiraki sayesinde belli müsbet neticeler elde etildi.

 Lâkin mezkür işniñ eñ mesülietli basqıçı daa ileride olğanı ve bunı da birlikte yapmaq lâzimligi de bildirildi.

Ali Hamzin şunı da qayd etti ki, bu işniñ amelge keçmesine Qırımnıñ tarihiy ve medeniy degerliklerini YÜNESKO variyetiniñ dünya cedveline kirsetüv boyunca halqara ekspert komissiyasınıñ başı professor Bernd fon Drosteniñ eki defa ziyareti siltem oldı. Bu ziyaretlerni teşkil etüvde Avropa Birliginiñ Ukrainadaki Joze Manuel Pintu Teyşeyra yolbaşçılığındaki vekâletliginiñ issesi büyüktir.

Körüşüvniñ soñunda subetdeşler Qırımda qırımtatar halqınıñ medeniy variyeti degerliklerini ögrenüv işini devam ettirmekniñ zarurlığını qayd ettiler.