Menu 
16 qırımtatar mektebiniñ maddiy-tehnikiy bazası pekitildi
14 Dekabr 2011
Qırım Muhtar Cumhuriyetinde qırımtatar mekteplerinde qırımtatar tilinde tasil ceryanınıñ inkişafına siltem bergen maddiy-tehnikiy bazalarını pekitmek maqsadında “Maarifçi” birleşmesi ve “Alraid” bütünukrain cemaat teşkilâtları birleşmesi Qırımtatar halqı Meclisiniñ reberliginde ve İslâm İnkişaf bankınıñ maliyeviy qoltutuvında 2009-2010 seneleri “Qırımtatar tilinde oqutılğan mekteplerniñ maddiy-tehnikiy bazasını pekitüv” leyhasını amelge keçirdiler.
Leyha 2010 senesi 9 mektep – Bağçasaraydaki 5-nci, Bağçasaray rayonı Alma-Tarhan köyündeki 2-nci, Bağçasaray rayonı Küçük Yaşlav köyündeki 18-nci, Kezlev şeeri İsmail–bey qasabasındaki milliy, Qarasuvbazar rayonı Zuya qasabasındaki 2-nci, Canköy rayonı Zareçnoye köyündeki, İçki qasabasındaki 3-nci, Eski Qırım şeerindeki 2-nci ve Sudaq şeerindeki 3-nci mekteplerni qavrap aldı.
Leyha çerçivesinde aşağıdaki işler yapıldı:
– mekteplerniñ tışqı divarları tamirlendi;
– mekteplerniñ içersindeki binalar tamir etildi;
– ayatlarındaki töşemeler deñiştirildi;
– pencere ve qapılar demir plastik soylarına deñiştirildi.
Mektepler içün satın alındı:
– usul ve sınıf odaları içün mebel;
– zarur orttehnika;
– fizika, himiya, biologiya kabinetleri içün donatma;
– kitaplar;
– bilgisayar sınıfı;
– oğlan ve qız balalar içün emek dersleri keçirilgen oquv ustahaneleri;
– sport zalları;
– tibbiy kabinet;
– aşhane;
– yardımcı inşaatlar.
Sudaq ve Bağçasaray mekteplerinde taşlandıq mağazlar trenajör zalı, oquv ustahane ve aşhane içün keliştirip tamir etildi. Eski Qırım ve Bağçasaray şeerindeki 5-nci mektep qoralanıp, yañı azbar qapılar qoyuldı.
İşler bitken soñ mekteplerde bularnıñ taqdimi ötkerildi.
2011 senesi “Alraid” ve “Maarifçi” ortaq birleşmeler “Qırımtatar tilinde oqutılğan mekteplerniñ maddiy-tehnikiy bazasını pekitüv” leyhasınıñ başlanğıç tranşınıñ amelge keçirilmesini soñuna yetkizdiler. Bu yıl keçken yıldakisi qadar iş yapıldı.
Leyha aşağıdaki mekteplerni qavrap aldı:
– Aqmescit rayonı Bulğanaq köyündeki 2-nci;
– Curçı rayonına Sarı-Baş qasabasındaki;
– Canköy rayonı Mayskoye köyündeki;
– Qurman rayonı Büyük-Onlar köyündeki 3-nci;
– Qarasuvbazar şeeri 4-nci;
– Qarasuvbazar rayonı Alevki köyündeki;
– Aqmescit şeerindeki 42-nci mektep.
“Alraid” bütünukrain cemaat teşkilâtları birleşmesiniñ baş direktorı, Islamicdevelopment vekili doktor İsmail Qadı leyha çerçivesinde yapılğan işlerni qabul etmek içün dekabr 12 künü Qırımğa keldi. Eki kün devamında 7 mektepte yapılğan işler taqdim olundı.
Keçken senedekisi kibi taqdimde çeşit seviyedeki deputatlar, Milliy Meclis ve yerli meclisler, Qırım musulmanları diniy idaresi, rayon ve şeer devlet memuriyetleri, rayon, şeer ve köy şuraları, Qırım Tasil nazirligi, rayon ve şeer maarif idareleriniñ vekilleri, ana-babalar ve cemaatçılıq iştirak etip, leyhanıñ reberleri – “Alraid” bütünukrain cemaat teşkilâtları birleşmesi Qırım bölüginiñ reisi Muhammed Taha ve “Maarifçi” qırımtatar maarifçileri birleşmesiniñ reisi, Qırım Yuqarı Şurasınıñ deputatı Safure Kacametovağa teşekkürlerini bildirdiler.
Mekteplerde taqdim merasimlerinde er bir talebege “Alraid” birleşmesinden bahşış berildi.
Mekteplerdeki bayramğa kelgen qartlar Vatanğa qaytıp, yerleşüv meşaqatlarını çekken qırımtatar halqına böyle büyük yardımda bulunğan İslâm İnkişaf bankınıñ yolbaşçılarına köz yaşları ile minnetdarlıq bildirdiler.
