Halqara insan uquqları kününe bağışlanğan Bütünqırım mitinginiñ qararı

10 Dekabr 2011

2011 senesi dekabr 10                                                                                                           Aqmescit

TİLDE, FİKİRDE, İŞTE – BİRLİK!

İnsan uquqları ve serbestligi em de halqlarnıñ öz-özüni belgilev aqqı halqara uquqnıñ Birleşken Milletler Teşkilâtınıñ Nizamnamesinde pekitilgen esas printsipleri bütün devletler içün mecburiydir.

1954 senesi Birleşken Milletler Komiteti Nizamnamesi, soñra Umumiy insan uquqları deklaratsiyası, Grajdanlıq ve siyasiy uquqlar aqqında halqara pakt, İqtisadiy, sotsial ve medeniy aqlar aqqında halqara paktlar qabul etilgen soñ devirde insaniyet inkişafı şundan delâlet bere ki, bu printsiplerge riayet etmegen devletler öz vatandaşları ve cemiyetleriniñ inkişafı içün normal ve adaletli şaraitlerni teminlep olamaz.

Biz, Aqmescitte dekabr 10 künü keçirilmekte olğan Bütünqırım mitinginiñ iştirakçileri, mustaqil ve demokratik Ukraina devleti qurulmasınıñ, onıñ Avropa Birligine kirmek maqsadlarına uyğanımız alda beyan etemiz ki, Ukrainada insan uquqları temin etilmemesi, on yıllarnen sürgünlikten soñra öz Vatanına qaytmaqta olğan qırımtatar halqı uquqlarınıñ ğayrıdan tiklenilmemesi Ukrainada epsi grajdanlarınıñ musaviyligi, adalet ve munasip yaşayışnı teminleyebilecek grajdan cemiyetiniñ şekillenmesine mania olur.

Aynı zamanda Avropa Keñeşi, Avropa Birligi, ÖBSE, Birleşken Milletler Komitetiniñ vazifedar şahıslarına, bunıñ kibi de Ukrainada akkreditatsiya etilgen diplomatik missiya yetekçilerine Ukrainada qırımtatarlarnıñ hususiy ve umumiy aqlarınıñ teminatı içün uquqiy şarait olmağanınen belgilengende qırımtatar halqınıñ vaziyetine diqqat ayırğanları içün teşekkür bildirerek, Ukraina Prezidenti, Ukraina Yuqarı Şurası, siyasiy partiya ve cemaat teşkilâtlarını Qırımtatar halqınıñ öz vatanında aqlarını ğayrıdan tiklev, onıñ Ukrainada inkişafı ve telükesizligini teminlev boyunca halqara forum keçirüv teşebbüsine qoltutmalarına çağıramız.

Qırımtatar halqınıñ öz vatanında aqlarını ğayrıdan tiklev, onıñ Ukrainada inkişafı ve telükesizligini teminlev boyunca halqara forumnıñ Avropa ve halqara teşkilâtlarnıñ imayesi altında keçirilmesiniñ müimligi aşağıdaki maddelernen belgilene:

– SSSR kommunist rejimi tarafından 1944 senesi mayıs 18-de qırımtatar halqı sürgünliginiñ ve on yıllarnen sürgünlik yerlerinde tutulğanınıñ aqibetlerini yoq etüv zarurlığı

– Ukrain devletine Qırımtatar halqınıñ siyasiy, iqtisadiy, sotsial ve medeniyet aqlarınıñ ğayrıdan tiklemesine, bunıñ kibi de onıñ öz Vatanında yerleşmesini temin etken qanunlarnıñ qabul etmesine er taraflı yardım köstermek zarurlığı

– insan uquqı ve qırımtatar halqınıñ aqları ğayrıdan tiklenilmesi ve halqara insan ve halq uquqları aqqında aktlarında pekitilgeni kibi riayet etilmesinde demokratik ve mustaqil Ukrainağa yardım bermek zarurlığı.

Biz, Bütünqırım mitinginiñ iştirakçileri, qırımtatar halqınıñ Qırımtatar halqınıñ birdemligi ve maneviy birligini pekitmek, qırımtatar halqınıñ saylanma organları olğan Qırımtatar halqı Qurultayı, Milliy Meclisi, regional ve yerli meclislerni inkişaf ettirmek ve pekitmek içün biz bütün çare-tedbirlerni körermiz.

Biz qırımtatar halqınıñ ulu evlâdı İsmail Gasprinskiyniñ “Tilde, fikirde, işte – birlik!” sözleri Qırımnıñ milleti ve diniy mensüpliginden qatiy nazar bütün sakinleri içün Qırım ve onıñ kelecegi oğrunda birleştirici davet olacağına eminmiz.

Halqara insan uquqları kününe bağışlanğan Bütünqırım mitinginde qabul etildi.

Miting iştirakçileriniñ sayısı 5000-den ziyade insannı teşkil etti.

2011 senesi dekabr 10, Aqmescit ş.