Qarasuvbazar şeeriniñ cemaatçılığı Qırımtatar halqı Meclisiniñ itibarını tüşürmege oğraşqan fesatçılarnıñ areketlerini qaraladı

29 Noyabr 2011

Qarasuvbazar şeeri cemaatçılığınıñ beyanatı

Biz, qırımtatar halqınıñ Qarasuvbazar şeerinde yaşağan vekilleri, noyabr 21 künü Aqmescitte qırımtatar halqınıñ milliy idare organı Meclisniñ itibarını tüşürmek maqsadınen aktsiya keçirgen bir gruppa insannıñ areketlerini keskin qaralaymız.

Öz imkânlarına qarardan ziyade qıymet kesken, izzetnefisleriniñ qararını qaçırğan, nasıldır siyasiy yahut başqa bir sebeplernen qırımtatarlarnıñ milliy idare organınıñ olğanını bile istemegen ya da belli bir qılıqları içün çetleştirilgen bu insanlarnıñ faaliyeti daima Qurultay ve Meclis qararlarına qarşı doğrultıla.

Biz, er bir semetdeşimiz içün bir maqsadlar oğrunda küreşimizde milliy birligimiz saqlanılacağında eminmiz.

Qarasuvbazar şeer meclisi
Sarı-Su qasabasınıñ meclisi
Qarasuvbazar şeer şurası “Qurultay-Ruh” deputat gruppası
Qarasuvbazar şeer musulman cemiyeti
“Qardaşlıq” cemaat teşkilâtı

Qarasuvbazar şeer meclisiniñ reisi Enver Üseinov

28.11.2011 s.