Qırımtatar qadınlar birligi esabat-saylav konferentsiyasını keçirdi

28 Noyabr 2011

2011 senesi noyabr 28 künü Aqmescitteki “Marakand” musafirhanesiniñ toplaşuvlar salonında Qırımtatar qadınlar ligasınıñ esabat-saylav konferentsiyası olıp keçti. 1994 senesiniñ mart ayında Bütünqırım konferentsiyasında tesis etilgen Qırımtatar qadınlarınıñ birligi mına endi on beş yıldan berli Safinar Cemilevanıñ reisliginde aktiv faaliyet köstermekte.

“Teşkilâtımıznıñ baş maqsadı qadınlar ve balalarnıñ uquqlarını qorçalamaqtır, – dedi qadınlar birliginiñ reisi S.Cemileva.- Bugün Qırımnıñ 15 rayon ve şeyeerlerinde Birligimizniñ vekâletlikleri mevcut. S.Cemilevanıñ aytqanına köre, onıñ reberligindeki teşkilât sotsial, medeniy, uquqiy ve halqara saalarda iş alıp bara.

“Teşkilâtımız meydanğa ketirilgeninen Vatanımıznıñ tışında yaşağan diasporanen bağ tutıp, Türkiye, Amerika ve Romaniyada vekâletliklerimizni açmağa nail oldı”, – deyler Qadınlar birligi idaresiniñ azaları.

Bundan da ğayrı, Safinar Cemileva Qadınlar ligası teşkil etilgeniniñ ilk kününden Türk qadınları konfederatsiyasına kirdi ve onıñ bütün forum ve qurultaylarında iştirak etti.

Kün tertibinde teşkilât idare azalarını ğayrıdan saylav, bir sıra resmiy dokumentler qabul etüv ve medeniy programma közde tutulğan konferentsiya iştirakçilerini hayırlamaq içün Meclis reisiniñ muavini, Qırım Yuqarı Şurasınıñ Milletlerara munasebetler ve sürgün etilgen grajdanlarnıñ işleri boyunca daimiy komissiyasınıñ reisi Remzi İlyasov, Ukraina Prezidentiniñ Qırımdaki daimiy vekiliniñ muavini İbraim Mamutov, Qırım musulmanları müftisiniñ muavini Ayder İsmailov, “FOND “KRIM” Hayriye teşkilâtınıñ reisi Riza Şevkiyev, Meclis azası Suleyman Abmecitov, gumanitar leyha “İRD” halqara yardım ve inkişaf teşkilâtınıñ başı Tatyana Jabenko, Qırım Tasil ve ilim, sport ve gençlik nazirliginiñ vekilleri ve digerleri keldiler.

Konferentsiyanıñ başında delegat ve musafirlerniñ diqqatına Qırımtatar qadınlar birliginiñ faaliyeti aqqında film taqdim olundı. 15 yıllıq faaliyeti devamında teşkilât qadınlar ve balalarnıñ uquqlarını qorçalavğa dair bir sıra leyhalarnı amelge keçirdi. Cümleden, Soros fondı ile işbirlikte AQŞnıñ gumanitar yardım boyunca devlet departamentinen emekdaşlıq çerçivesinde pek çoq insan ve teşkilâtlar aşayt ve urba yardımı aldılar. Birlikniñ areketleri sayesinde 20-den ziyade öksüz bala yañı aile saibi oldı. Liga taşlanğan balalar probleminen de faal oğraşa.

“Bizim teşkilâtımız muhtac ailedeki, saqat balalar, öksüz balalar boyunca malümatlarnı toplap, olarğa er taraflı yardım köstermege tırışa”, – bildirdiler birlikniñ azaları.

Qadınlar ligası Qırımtatar halqınıñ Meclisinen beraber Qırımnıñ çeşit regionlarında “Narat bayramı”nı keçire. Liga istidatlı balalarğa da büyük diqqat ayırğanı sayesinde kiçkene artistler Türkiye, Romaniya, Bulğaristan, Poloniya, Birleşken Arap Emirliklerini ziyaret ettiler.

Bunıñ kibi de Qadınlar ligası matbaacılıq faaliyetine de ayrıca emiyet bere. İşte, teşkilâtnıñ qoltutuvında qırımtatar qadınlarınıñ faaliyeti aqqında ikâye etken “Qırımnıñ sadıq qızları” kitabı, “Arzı” mecmuası neşir etildi.

Esabat-saylav konferentsiya iştirakçileriniñ rey berüv neticelerine köre Qırımtatar qadınlar ligasiniñ reisi olaraq kene Safinar Cemileva, muavini – Emine Bekirova saylandı. Bunıñ kibi de sotsial, medeniy, adliye ve cemaat ile alâqa bölükleriniñ reberleri de saylanıp, Teftiş komissiyasınıñ erkânı yañılandı.

Esabat-saylav konferentsiya devamında delegatlar Qırımtatar qadınlar ligasına türk dünyasında ilk qadın mecmuası “Alem-i Nisvan”nıñ muarriri, İsmail Gasprinskiyniñ qızı Şefiqa Gasprinskayanıñ adı berilmesini birağızdan qoltuttılar.

Bundan da ğayrı qadınlar teşkilâtınıñ azaları ve “Tezis” neşriyatınıñ direktorı Ediye Müslimova Qırımtatar halqı Meclisi ve şahsen Mustafa Cemilevniñ qoltutuvı sayesinde balalar içün qırımtatar tilinde çıqqan “Armançıq” mecmuasını taqdim ettiler.

Esabat-saylav konferentsiyanıñ delegatları 2011 senesi noyabr 21 künü Aqmescitte Qırımtatar akademik teatr yanında toplanğan şahıslarnıñ provokatsion areketlerini qaralağanları aqqında beyanat qabul ettiler.

“Bütün umummilliy meselelerni qırımtatar halqı qurultayınıñ platformasında al etmek kerekligine eminmiz”, – denile Qırımtatar qadınlar ligası esabat-saylav konferentsiyasınıñ beyanatında. Beyanat müellifleri qırımtatar halqına muracaat etip, provokatorlarnıñ areketlerini qaralamaq ve halqımıznıñ birligini pekitmek oğrunda cemaat çare-tedbirlerini körmege çağırdılar.