QIRIMTATARLAR MİTİNGİNİÑ QARARI: «PROVOKATORLARĞA – YOQ! «YAŞASIN QIRIMTATAR HALQINIÑ BİRLİGİ!»

21 Noyabr 2011

Bugün, 2011 senesi noyabr 21 künü  semetdeşlerimiz arasında evelden de qırımtatar halqınıñ birligine qarşı  bölüci areketlerinen belli on- on beş adam kene milliy areketni parçalamağa tırıştı. Öz halqı tarafından siyasiy ömürniñ kenarına taşlanğan, bundan evel de, cümleden keçken Qırım Yuqarı Şurası, maalliy şuralarğa ve köy, qasaba, şeer reberlerini saylavlarda, qırımtatar halqını bölmege tırışqan bir gruppa provokatorlar şorbacılarından alğan avaleni eda eterek öz halqına qarşı esassız ve yalan beyanatnen çıqıp, kölemli bir provokatsiyanı keçirmek areketini yaptılar.

Provokatorlar ve olarnıñ şorbacılarınıñ ögüne Qırımtatar halqı Qurultayı, Meclisi, regional ve yerli meclislerden ibaret olğan qırımtatar halqınıñ öz-özüni idare etüv organlarını bozmaq, bundan da ğayrı çoqtan-çoq qırımtatar cemaat teşkilâtları, qırımtatar halqı milliy areket veteranlarınıñ   faaliyetini başqa yolğa burmaq, Qırım musulman ümmeti arasına şına qaqmaq  vazifesi qoyulğan.

Şunı ayrıca qayd etmeli ki, qırımtatar halqınıñ milliy areketine qarşı provokatsiyalarnıñ faalleşüvi,  şübesiz,  halqara teşkilâtlarnıñ imayesinde  Qırımtatar halqınıñ öz Vatanında aq-uquqlarını ğayrıdan tiklev, Ukrainada onıñ telükesizligi ve inkişafını teminlev boyunca halqara forumnı keçirüv müddeti ep yaqınlaşqanınen bağlıdır.  Qırımtatar halqı aq-uquqlarınıñ ğayrıdan tiklenmesine qarşı çıqqanlar provokatorlarnıñ hızmetinden qullanaraq Halqara forumnı keçirmege imkân bile qaldırmamağa ıntılalar.

Siyasiy tecribe saibi olğan ve çeşit türlü provokatsiyalarğa, şu cümleden bugünkisi kibi, angisinde semetdeşlerimiz sırasından bazı satqınlar da qarışqan, soylarına rastkelgen  qırımtatar halqı Vatanğa qaytuv oğrundaki küreş yıllarında onıñ birligi-beraberligini bozmaq niyetinde olğan provokatorlarğa amansız qarşılıq kösterecek.

Qırımtatar halqınıñ öz Vatanına kütleviy sürette qaytıp başlağanınıñ eñ mesülietli vaqtında  ve milliy tiklenüvniñ ilk adımlarında, 1991 senesi iyün ayında qırımtatar halqı ananeviy milliy institut – Qurultaynı ğayrıdan tikledi ve öz-özüni idare etüv milliy organlarını qurdı. Bunıñ sayesinde ananeler saqlana, nesiller bağı qaviyleşe, qırımtatar halqı menfaatları oğrundaki yüksek maqsadlarnıñ amelge keçmesi temin etile.

Biz, miting iştirakçileri, semetdeşlerimiz sırasından marginal şahsılarnıñ provokatsion areketlerini qaralap, qırımtatarlarnıñ öz-özüni idare etüv milliy organları – Qırımtatar qurultayı, Qırımtatar halqınıñ Meclisi, regional ve yerli meclislerge qoltutamız.

Biz, miting iştirakçileri, provokatorlarnıñ çirkin areketlerini keskin qaralamağa ve qırımtatar halqınıñ birligi-beraberligini pekitmek içün cemaat çarelerini körmege çağıramız!