«Ukrainada yekâne qırımtatar kitaphanesi misalinde qırımtatar medeniyetiniñ inkişafına isse qoşmaq er kesniñ borcudır», – dedi M.Cemilev

20 Noyabr 2011

2011 senesi noyabr 19 künü  İ.Gasprinskiy adına qırımtatar kitaphanesinde şu  cumhuriyet müessisesi yanında meydanğa ketirilgen Vasiylik keñeşiniñ birinci toplaşuvı olıp keçti. Kitaphaneniñ yañı müdiri Gülnara Yagyayeva kitaphane reberleri deñişkeni sebebinden Vasiylik keñeşiniñ de yañı erkânını saylamaq qararı aqqında haber etti. Yañı erkânğa  Meclis, Qırım Yuqarı Şurası, Qırım Nazirler Şurası, Aqmescit şeer akimiyeti vekilleri, qırımtatar jurnalistleri ve cemaat erbapları kirsetildi.

Vasiylik keñeşiniñ birinci toplaşuvında  Qırımtatar halqı Meclisiniñ reisi Mustafa Cemilev, Qırımtatar tasil hadimleri “Maarifçi” birleşmesiniñ reisi, Meclis azası Safure Kacametova,  Aqmescit şeer şurasınıñ deputatları Seytumer Berberov ve Sadıq Tabah, Cumhuriyet milletler komitetiniñ reisi Edem Dudakov, “Can yürekten” hayriye fondınıñ prezidenti Ebazer Emiraciyev,  “Qırımoquvpedneşir” neşriyatı direktorı  İbraim Çegertma, qırımtatar medeniyet fondınıñ reisi Ridvan Ayedinov,  “Poluostrov” gazetasınıñ muarriri  Ayder Emirov, İ.Gasprinskiy adına kitaphane direktorınıñ ilmiy işler boyunca muavini Leylâ Qadırova ve iş adamı Rasim Kerimov iştirak ettiler.

“Vasiylik keñeşiniñ esas vazifelerinden biri kitaphane inkişafına olduqça siltem bermek, bunıñ kibi de oquyıcılarımızğa informatsion hızmet kösterüvni daa da yüksek seviyege kötermektir, – dedi kitaphane direktorı  “Gülnara Yagyayeva. Onıñ aytqanına köre, qırımtatar cemiyetiniñ informatsion potentsialını saqlav ve arttıruv oğrunda faaliyet köstergen kitaphane ana tili, medeniyet ve edebiyat taqdirinen meraqlanğan devlet müessiseleri, icadiy birleşme ve iş adamlarınıñ yardımına ğayet muhtac. 

Kitaphanege Meclis, cumhuriyet müessiseleri, çeşit fond ve hususiy şahıslar tarafından defalarca yardım kösterildi. Bundan da ğayrı  kitaphane hadimleri  halqara grant almağa nail olıp, bu sermiya esabına kitaphanede internet merkezi açıldı, yañı tehnika donatmaları alındı. “Eski elyazmalarnı kopiyalamaq imkânını bergen paalıdan-paalı aletni nice qıyınlıqlarnen satın aldıq, amma onı çalıştırmaq içün kitaphane binasında yer yoqtır, – dep bildirdi direktor.

Kitaphane reberleriniñ aytqanına köre, Ukrainadan tışta yaşağan bir çoq insan qırımtatar halqı aqqında ellerinde bulunğan nadir kitaplar, qıymetli arhivlerni bermege azırlar, lâkin bahşışlarnı yerleştirmege kene de de kitaphaneniñ imkânları yoq.  İ. Gasprinskiy adına kitaphane inkişafınıñ istiqballerini muzakere etken Vasiylik keñeşiniñ azaları kitaphanege oquv zalı, meclisler salonı ve kitaplar saqlanılğan odalarnı açmağa imkân bergen qoşumca bina qurmaqnıñ zarurlığı qayd etip, bu binanıñ leyhasını azırlamaq ve işni başlamaq qararını aldılar.

Çoqluqnıñ rey berüv neticesinde Vasiylik keñeşiniñ reisi olaraq saylanğan Meclis reisi Mustafa Cemilev yañı keñeşniñ baş vazifesini daa bir kere qayd etip, bu vazifeniñ amelge keçmesine er kes faal yanaşmaq kerekligini ayttı. “Ukrainada yekâne qırımtatar kitaphanesi misalinde qırımtatar medeniyetiniñ inkişafına isse qoşmaq er kesniñ borcudır. Em er bir insan elinden kelgen intellektual, teşkilâtiy ve maddiy destekni köstermeli “, – dedi M.Cemilev

Vasiylik keñeşiniñ toplaşuvları yılda eki kere ötkerilmesi, ağımdaki faaliyetni ise yedi adamdan ibaret Prezidiumğa avale etilmesi belgilendi.