Milliy küreş boyunca III-nci halqara yarış

10 Noyabr 2011

9 noyabr künü Aqmescitteki “Lokomotiv” sport kompleksinde Qurban bayramına bağışlanğan halqara küreş yarışı ötkerildi.
Bütündünya qırımtatarlar kongressiniñ atalığında er yılı keçirilgen Küreş boyunca halqara yarışlarnı Qırım milliy küreş federatsiyası teşkilâtlandıra.

Tedbirge Meclis reisi Mustafa Cemilev, Bütündünya qırımtatarlar kongressiniñ prezidenti, Qırım milliy küreş federatsiyasınıñ fahriy prezidenti Refat Çubarov, Ukraina Prezidentiniñ Qırımdaki daimiy vekiliniñ vazifesini eda eticisi Viktor Plakida, onıñ muavini İbraim Mamutov, Meclis tışqı alâqalar bölüginiñ başı Ali Hamzin teşrif buyurdılar.

Çetelli musafirler arasında Bursa şeeri başınıñ muavini Abdulla Qaradağ, Romaniya ükümeti devlet kâtibiniñ muavini Necat Sali, Eskişeer qırımtatar derneginiñ başı Mesut Or, Hocaeli qırımtatar derneginiñ vekili Recep Şeyen ve digerleri bar edi.

Küreş boyunca halqara yarışta Ukraina, Rusiye, Türkiye, Bulğaristan, İsrail Romaniya ve Qırımdan kelgen 200-den ziyade sportçı iştirak etti. Ğaliplerge namazlıqlar, diniy kitaplar, divar saatleri, Qırım küreş federatsiyası, Bütündünya qırımtatarlar kongressi ve Bütünukrain cemaat teşkilâtlarınıñ “Alraid” birleşmesiniñ logosı olğan kölmekler ediye etildi. Bütün çeki kategoriyalarında birinci yerni qazanğanlarğa yarışnıñ baş mukâfatı – qoy berildi.

Küreş yarışına dünyanıñ yedi memleketinden kelgen iştirakçilerini selâmlağan Meclis reisi Mustafa Cemilev er keske muvafaqiyet tilep, ananege çevirilgen yarış yüksek seviyede azırlanılğanını, küreşniñ yaş yigitlerge ustalıqlarını arttıruvda siltem olğanını qayd etti.

“Er sene biz yañı istidatlı yigitlerni köremiz. Olar milliy küreşimizni şeref ile taqdim eteler ve çeşit yarışlarda nufuzlı yerlerni qazanalar”, dedi M.Cemilev, pelvanlar ve olarnıñ mühlislerine muracaat eterek. Bunıñ kibi de Mustafa Cemilev Bütündünya qırımtatarlar kongressi ve Qırım milliy küreş federatsiyasınıñ qırımtatar milliy küreşni teşviq etüvde hızmetlerini ayrıca qayd etti.

Yarış teşkilâtçıları adına Halqara quşaqlarnen küreşüv federatsiyasınıñ prezidenti (IBWA) Lüdmila Gaynanovanıñ (Moskva) telegramması oquldı. Cümleden onda yañıdan tikleneyatqan qırımtatar milliy küreşi dünyaca belli quşaqlarnen küreşniñ inkişafına isse qoşacağına eminlik bildirilgen.