Qurban Bayramıñız Mubarek olsun!

05 Noyabr 2011

Ulu Bayram hayırlı olsun! Alla-Taalâ yapqan eyilikleriñizni, çalğan qurbanlarıñıznı qabul etsin!

İman milliy tiklenilmemizge quvet bermekte

Sayğılı vatandaşlar!
Mühterem Qırım musulmanları!

Bütün İslâm ümmetinde eñ büyük bayram sayılğan Qurban Bayramı faniy alemimiz ve aziz Ana-Yurtumızğa yetip kelgeni hayırlı olsun!

Çoq asırlar devamında ecdatlarımızğa eñ ağır vaqıtlarda küç-gayret, sabır-ümüt bağışlagan muqaddes dinimiz ve imanımız bugünde de milliy tiklenilmemizge, Vatan saipligine irişmemizge tayanç olğan, adalet küreşimizni ruhlandırğan, inkişafımızğa siltem bergen quvettir.

Dinge-imanğa sarılmaq biz içün Ana-Yurtqa qavuşmaq, halqımıznıñ aq-uquqlarını talap etmek, baba-dedelerimizden qalğan mirasnı qaytarmaq, birlikke esaslanıp, milliy devletçiligimizni tiklemek kibi ğayet müim faaliyetnen bağlı ve beraberlikte olmaqta.

Yüce Rabbimiz bu areket ve faaliyetimiz neticesinde beklenilgen maqsatlarğa yetmekte Özü yardımcı em de er bir qırım qorantasında baht-seadet, muabbetlik, quvançlı künler üküm sürmesinde tayanç olsun!

Bala-torunlarımız sağlam, aqıllı, muvafaqiyetli vatanperverler olaraq össinler. Alla-Taalâ oquğan dualarıñıznı, çalğan qurbanlarıñıznı qabul etsin!

Qırımtatar Milliy Meclisi