Menu 
Aqmescitniñ Abdal mezarlığında Seydamet Memetovnıñ baştaşı qoyuldı
30 Oktâbr 2011
Oktâbr 29 künü Aqmescitniñ Abdal mezarlığında Qırımtatar halqı milliy areketiniñ faal iştirakçisi Seydamet Memetovnıñ qabirinde baştaşı qoyuldı.
Seydamet Memetovnı añmaq içün qabristanda onıñ yaqınları, soy-aqrabaları, dostları ve safdaşları toplandılar. Tedbirde Qırım Milletlerara munasebetler ve sürgün olunğan grajdanlarnıñ işleri boyunca cumhuriyet komitetiniñ reisi Edem Dudakov da bulundı.
Baştaşı açılışı duanen başlanıp, tedbirde bulunğanlar Seydamet Memetovnıñ milliy küreşke qoşqan issesi aqqında hatırlavlar yañğıradı. Refat Ablayev yapqan beyaz baştaş üzerinde: “Halqqa hızmet oldı niyet, bütün halqtan saña ürmet” degen sözler oyulğan.
“Seydamet Memetov – qırımtatarlar milliy areketiniñ qaramanı. Ömüriniñ soñki daqqasına qadar o, halqı içün canını bermege azır edi. Bu insannıñ göñlü aydın edi, şunıñ içün de baştaşını beyaz taştan yasamaq qararına keldik”, – dedi Qırım Milletlerara munasebetler ve sürgün olunğan grajdanlarnıñ işleri boyunca cumhuriyet komitetiniñ reisi Edem Dudakov ve kelecekte Seydamet Memetonıñ adını Qırımdaki soqaqlarnıñ, mekteplerniñ birine bermek közde tutulğanını da qayd etti.
Malümat: Seydamet Memetov 1941 senesi oktâbr 10 künü Bağçasaraynıñ Aziz maallesinde dünyağa keldi. Qırımtatar halqınıñ milliy areketindeki faal iştiraki içün dört kere üküm etildi (1968, 1976, 1978, 1979 ss.), azat olunğan soñ ise qırımtatar halqınıñ aq-uquqları içün küreşni daa ziyade faalliknen devam etti.
1993 senesinden başlap ve ayatınıñ soñki künlerinece Qırımtatar halqı milliy areketiniñ kâtibi edi.
S. Memetov 2010 senesi mart 13-te vefat etti.
