ÖBSE milliy azlıqlarnıñ işleri boyunca aliy komissarı Knut Vollebek Mecliste körüşüv ötkerdi

14 Oktâbr 2011

13 oktâbr künü  Meclis reisiniñ birinci muavini Refat Çubarov ÖBSE milliy azlıqlarnıñ işleri boyunca aliy komissarı  Knut Vollebeknen  Meclisniñ ofisinde körüşti. 

Körüşüvde Aliy    komissarnıñ yardımcıları Lars Ragnar Ölerud Hansen, Aleksandr Vinnikov ve Vinsent de Graaf, Qırımtatar halqı Meclisi tarafından ise  Meclis reisiniñ muavini Remzi İlyasov, Kâtibiyetiniñ başçı   Zair Smedlâyev, tışqı alâqalar bölüginiñ müdiri  Ali  Hamzin, Topraq komissiyasınıñ reberi  Zevcet Kurtumerov, Meclis azası,  “Qırım” gazetasınıñ baş muarriri Bekir Mamutov iştirak ettiler,

 Körüşçüv devamında  qırımtatarlarnı topraqnen teminlev, qırımtatar tilinde tasil, 2012 senesinde qırımtatarlarnıñ qaytuvı ve yerleşüvi programmasınıñ maliyeviy teminlenilmesi meseleleri ve Meclisnen Qırım ükümeti arasındaki munasebetlerniñ hususiyetleri muzakere etilip, cümleden Qırımtatar  halqınıñ uquqlarını ğayrıdan tiklev, Ukrainada onıñ telükesizligini teminlev boyunca halqara forumğa azırlıqnıñ ketişatına da  diqqat ayırıldı. 

 ÖBSE milliy azlıqlarnıñ işleri boyunca aliy komissarı  Knut Vollebek Meclis reberleriniñ Ukrainada akkreditatsiya etilgen halqara teşkilât vekilleri, elçilernen  oktâbr 5 künü Kiyevde olğan körüşüvniñ neticelerine yüksek qıymet keserek,  ÖBSE Aliy komissarı olaraq  olacaq Forumnıñ maqsadları ve vazifelerini belgilev boyunca menfaatdar taraflar ile em birinci nevbette Ukraina yolbaşçılarınen konsultatsiyalar basqıçına kirmege azırlığını bildirdi.

Meclisteki körüşüvden soñ  ÖBSE milliy azlıqlarnıñ işleri boyunca aliy komissarı  Knut Vollebek ve onıñ  yanından bulunğan Zevcet Qurtümerov, Zair Smedlâyev, Ali Hamzin, Qırım regional inkişafı ve qurucılıq naziri Sergey Brayko, Topraq komiteti ve Milletler komitetiniñ vekilleri  qırımtatarlarnıñ “narazılıq meydanlarına” yol aldılar.  

Şeer mezarlığınıñ qorulğan zonasına kirgen  Abdal massivini közden keçirdiler. Belli ki, keçenlerde anda topraq işğal etken insanlarğa  Dobroye köy şurasınıñ yerlerinde topraq berilgen edi. Bunıñ kibi de musafirler “Krımavtogaz”  massivinde de bulunıp, nefaqacı Ablâtipovlarnıñ evini ziyaret  ettiler.

ÖBSE milliy azlıqlarnıñ işleri boyunca aliy komissarı  Knut Vollebek musafirçen qonaqbaylarnen subetleşip, kendini meraqlandırğan suallerge cevap ala bildi.

Soñra Knut Vollebek ve yanında bulunğan insanlar Balaklavskaya  soqağındaki  7 gektar yerde qurulayatqan “Yañı dünya” maallesine de kelip, cami binasını baqtılar ve yerli sakinlernen subetleştiler. 

Şu künü aqşam  ÖBSE milliy azlıqlarnıñ işleri boyunca aliy komissarı  Knut Vollebek  Kiyevge qayttı.