Meclis reisi Mustafa Cemilev Çehiya parlamenti Yuqarı palatasınıñ senatorı Yaromir Ştetina ile körüşti

13 Oktâbr 2011

9 – 12 oktâbr künleri Qırımtatar halqı Meclisiniñ reisi Mustafa Cemilev Pragada bulunıp, “Forum 2000” “Demokratiya ve uquq üstünligi” mevzusında ötkergen XV Halqara konferentsiyanıñ işinde iştirak etti.

Konferentsiyanıñ yekünleyici künü Meclis reisi Mustafa Cemilev Çehiya parlamenti Yuqarı palatasınıñ senatorı Yaromir Ştetina ile körüşti.

Meclis reisiniñ subetdeşi – belli çeh jurnalisti, aktiv faaliyeti sayesinde sovetler devleti hududındaki bütün “qızğın noqtalar”da bulunğandır. Şimdi ise Ştetina Senata Çehiyanıñ Tışqı işler naziri Karl Şvartsenberg yetekçilik yapqan “TOP 09” partiyasından saylanğan deputatlardan birisidir. Bundan da ğayrı senator halqara meseleler, mudafaa ve telükesizlik boyunca parlament komitetiniñ ve dünyada demokratiyağa qoltutuv komitetiñ de azasıdır.

Halqara forumğa azırlıq aqqında aytırken Meclisniñ başı Mustafa Cemilev senatorğa cenap Şvartsenberg ile olğan subet aqqında ve onıñ öz aqları çerçivesinde yardım köstermege azırlığını bildirgenini de ayttı.

Senator Ştetina Çehiya tışqı işler idaresiniñ başı “sovetler rejimi devrinde zarar körgen halqlarnıñ tarihı ve taqdirlerini pek yahşı añlağanını” qayd etti.

Öz tarafından cenap Ştetina qırımtatarlarnıñ Forum keçirüv teşebbüsine qoltutuvda iştiraki hususında dedi ki. bu tedbir Qırımnıñ tamır halqınıñ meseleleri çezüvde Ukraina ükümeti içün halqara signal olur. Ve şunı da ilâve etti ki, “azası oldığı ÖBSE Parlament Assambleyasına Ukrainada Qırımtatar halqınıñ meseleleri boyunca Halqara forum teşebbüsine qoltutqanını bildirgen qararını da yollaycaq.