Pragada Yan Palah ve Yan Zayits eykellerine çeçekler

12 Oktâbr 2011

Qırımtatar halqı Meclisiniñ reisi Mustafa Cemilev devletlerini Varşava añlaşması qoşunları işğal etmesine qarşı özlerini yaqqan çeh studentleriniñ eykellerine çeçekler qoydı

Meclis reisi Mustafa Cemilev devletlerini Varşava añlaşması qoşunları işğal etmesine qarşı özlerini yaqqan çeh studentleri Yan Palah ve Yan Zayitsniñ eykellerine Qırımtatar halqı Meclisiniñ adından çeçekler qoydı

2011 senesi oktâbr 11 künü Meclis reisi Mustafa Cemilev, bunıñ kibi de onıñ yardımcıları Rustem Ümerov ve Liliya Müslimova Praganıñ Vatslav meydanında studetler areketiniñ faalleri v Yan Palah ve Yan Zayitsniñ eykellerine şerit üzerinde “Öz halqınıñ qaramanları – Yan Palah ve Yan Zayitslk Qırımtatar halqı Meclisiniñ adından” dep. yazılğan gülçember qoydılar.

Eykel Praganıñ merkeziy meydanlarında birinde, 1969 senesi yanvar ayında 21 yaşlı Yan Palah kendini yaqqan Vatslav meydanında tiklendi. Cesür genç vatanperver bedeniniñ 85 fayızı yanıp, o üç kün yaşap, soñra vefat etti. “Men munda olıp keçeyatqan adisege narazılığımnı bildirmek, halqımıznı uyandırmaq istegen dim…” – dedi Yan Palah zornen nefes alaraq. 1969 senesi fevral ayında Yan Palahnıñ yapqanını 18 yaşlı Yan Zayits de tekrarladı.

Çeh studentleriniñ ekisi de Varşava añlaşmasını imzalağan devletler Çehoslovakiyağa “Praga baarini” taptamaq içün kirsetilgen qoşunlarğa qarşı çıqtılar.

Praganıñ merkeziy meydanlarından biri Yan Palahnıñ adını taşıy, bunıñ kibi de Vatslav meydanında Milliy müzey qarşısında onıñ şerefine ağaçtan yasalğan haç turmaqta. Palah ve Zayits eykelleri yanında turar eken Mustafa Cemilev, qırımtatar halqı Vatanda yaşamaq uquqı içün 23 iyün 1978 senesi özüni yaqqan Musa Mamutnıñ adını unutmağanını qayd etti.

Musa MAMUT 1978 senesi 28 iyün künü Aqmescit hastahanesinde yaptığına iç de peşman olmağanı alda ve bu areketini qırımtatar halqınıñ aq-uquqları taptalmasına qarşı yapqanını aytıp öldi”, dedi M. Cemilev.

Maqalede www.kirimtatar.com saifesindeki malümatlardan faydalanıldı