M. Cemilev LIBERTY radiosında musafirlikte

12 Oktâbr 2011

11 oktâbr kününiñ ekinci yarısında Meclisniñ reisi Mustafa Cemilev “Svoboda” radiosı ukrain hızmetiniñ mühbiri Natalya Çurikovanıñ daveti ile dünyanıñ 20-den ziyade noqtasında ofisleri olğan, insan serbestligi ve uquqları aqqında yayınlağan eñ populâr radionıñ Pragadaki ofisini ziyaret etti.

Praga ofisinde bulunırken Mustafa Cemilev Azatlıq radiosınıñ tatar-başqırt, azerbaycan ve ukrain hızmetleriniñ de suallerine cevap berdi.

Bundan soñ “Svoboda”nıñ ukrain haberler hızmetiniñ başı Mihael Mihaylisko Qırımlı musafirlerge radionıñ yañı binasını kösterdi, bir çoq hızmetlerde çalışqan, şu cümleden Qırım ve Ukraina boyunca da yañılıqlar azırlağan 400-den ziyade hadimlerniñ işinen tanış etti. Bunıñ kibi de M. Mihaylisko radionıñ peyda oluv tarihı, faaliyetiniñ ilk basqıçlarını tarif etti. Belli ki o devirde vereqalar azırlanıp, çuvallarğa toldurılır ve kökten yerge darqalır edi.

Mustafa Cemilev “Svoboda”nıñ jurnalistlerine endi bir çoq subetleri arqalı belli, bazılarınen ise çoqtan şahsen de tanıştır. Meclis yolbaşçısını öz ofislerinde qarşılağan jurnalistler belli uquqqoruyıcını sıcaq selâmladılar.

“Öz semetdeşleriniñ Vatanğa qaytmasına yardım etken qırımtatar lideri ile şahsen tanış olmaq menim içün büyük şereftir. Em bu mürekkep, ögünde çeşit-türlü manialar turğan yolda iç kimseniñ qanı tökülmedi” , – dedi Cemilevnen subetleşken radionıñ şimaliy Kavkaz hızmetiniñ başv Asan Doukayev.

“Svoboda” radiosınıñ baş ofisinde Mustafa Cemilevnen beraber onıñ yardımcıları Rustem Ümerov ve Liliya Müslimova bulundılar.