A. Kvasnevskiy: “Men Halqara forumnı Avropada Telükesizlik ve işbirlik teşkilâtınıñ(ÖBSE) imayesi altında keçirmek ğayesiniñ tarafdarım”

05 Oktâbr 2011

Malüm ki, 2011 senesi oktâbr 5 künü Kiyev şeerindeki “HYATT” öteliniñ muşavereler salonında Qırımtatar halqı Meclisiniñ reberleri elçiler ve Ukrainada akkreditatsiya etilgen halqara teşkilâtlarnıñ vekillerinen körüştiler. Körüşüv iştirakçileri, qırımtatar halqınıñ bugünki vaziyetine dair meselelerni muzakere etmeknen bir sırada Qırımtatar halqınıñ öz Vatanında aq-uquqlarını ğayrıdan tiklev, onıñ Ukrainada telükesizligini ve inkişafını teminlev meseleleri boyunca halqara forum keçirüv mevzusını da muzakere ettiler.

Körüşüvge Avropa keñeşiniñ barışıqlıq boyunca reisi, 1995-2005 seneleri Poloniya Prezidenti Aleksandr Kvasnevskiy de davet etilgen edi. Bu aqta Mustafa Cemilev onıñ ile 2011 senesi sentâbr 16 künü Qırımda 8-nci Yalta Avropa strategiyası forumı keçirilgen vaqıtta körüşkende añlaştılar. Lâkin evelden planlaştırılğan bir sıra tedbirler sebebinden Aleksandr Kvasnevskiy 2011 senesi oktâbr 5 künü Kiyev şeerindeki körüşüvge kelip olamağanı içün o, Mustafa Cemilev adına mektüp yazıp. Halqara forum keçirilmesine ait fikirlerini ifade etti. Aşağıda Aleksandr Kvasnevskiy ofisiniñ musaadesi ile mezkür mektüpni derc etemiz:

Barışıqlıq boyunca Avropa keñeşi
 

                                                                              Ürmetli
                                                                              Qırımtatam halqı Meclisiniñ reisi
                                                                              cenap Mustafa Cemilevge

Sayğılı cenap Reis,

Qırımtatar halqı Meclisiniñ körüşüvine davet etkeniñiz içün samimiy teşekkürlerimni bildirem. Maña ve reislik yapmaq şerefine nail oldığım Barışıqlıq boyunca Avropa keñeşine işanç bildirgeniñiz meni ğayet sevindirmekte. Teessüf ki, evelden planlaştırılğan tedbirler sebebinden Kiyevdeki körüşüvde şahsen faal iştirak etip olamayım.

Keçenlerde Qırımda körüşkenimizde söyledigim kibi, qırımtatar halqınıñ Qırımğa qaytmaq ıntıluvına tolusınen qoltutqanımnı musaadeñizle tekrar bildirmege isteyim..

Poloniyalı, meşaqatlı taqdiri siziñkine pek beñzegen halqnıñ vekili olaraq sizlerniñ küreş maqsadıñıznı pek yahşı añlayım ve Qırımtatar halqı Meclisiniñ işine ayretlenem.

Zanımca, Ukraina akimleri qırımtatarlarnıñ öz yurtuna qaytmaları içün bütün çarelerni körmek, olarğa yaşamaq yerini serbest seçmek aqqını teminlemek, bunıñ kibi de olarnıñ taptalğan uquqlarını ğayrıdan tiklemek borclular. Bunıñ kibi de, bu vaziyette halqara cemaatçılığınıñ da yardımı kerçekten de zarur.

Qırımtatar halqınıñ öz Vatanında aq-uquqlarını ğayrıdan tiklev, Ukrainada onıñ telükesizligini ve inkişafını teminlev meseleleri boyunca halqara forum keçirmek ğayesi içün sizge Barışıqlıq boyunca Avropa keñeşi adından samimiy minnetdarlığımnı bildirem.

Barışıqlıq boyunca Avropa keñeşiniñ reisi olaraq qırımtatarlarnıñ dialognı devam ettirmek ve ameliy çareler qıdıruv oğrundaki areketlerine qoltutacağımnı işandıram. Men Halqara forumnı Avropada Telükesizlik ve işbirlik teşkilâtınıñ(ÖBSE) imayesi altında keçirmek ğayesiniñ qatiy tarafdarım. Böyle mürekkep meseleni halqara miqyasta muzakere etmek içün ÖBSE, şübesiz, eñ kelişken bir teşkilâttır.

Qırımtatar halqınıñ Meclisi ile işbirligimizniñ devamına ümüt besleyerek, Kiyevdeki körüşüvde alınğan qararlardan meni de haberdar etmeñizni rica etem. Qırımtatar halqınıñ bahtı oğrundaki faaliyetiñizde muvafaqiyetler tilep, büyük sayğı ve itiram ile
 

Aleksandr Kvasnevskiy
Avropa keñeşiniñ barışıqlıq boyunca reisi, 1995-2005 seneleri Poloniya Prezidenti
Varşava, 2021 senesi oktâbr 1