«Hoş keldiñ, Cengiz Dağcı!», Qırım ve qırımtatar halqı özüniñ ulu evlâdını şu sözler ile qarşıladı

02 Oktâbr 2011

Sentâbr 22 künü Londrada vefat etken büyük qırımtatar yazıcısı Cengiz Dağcınıñ vasiyeti ve Aqmescitte yaşağan qız qardaşı Ayşe hanım, diger soy-aqrabalarınıñ ricasına binaen merhumnıñ cenaze namazı Aqmescitteki Kebir camide oktâbr 2 künü qılındı.

Bir kün evelsi Cengiz Dağcınıñ naaşı “Türk hava yolları”nıñ uçağında Londradan Türkiyege soñra Qırımğa ketirildi.

Dünyaca meşur qırımtatar romancı yazıcısınen vedalaşmaq içün Kebir camige Qırımtatar halqı Meclisiniñ reisi Mustafa Cemilev, Bütündünya qırımtatarlar kongressiniñ Prezidenti Refat Çubarov, Ukraina Prezidentiniñ Qırımdaki daimiy temsilcisiniñ vazifesini eda etken Viktor Plakida, Qırım Nazirler Şurası reisiniñ muavini Georgiy Psarev, Qırım Medeniyet naziri Alena Plakida, Meclis azaları, Qırımtatar milliy areketiniñ iştirakçileri, qırımtatar yazıcıları, çoqtan-çoq qırımtatar teşkilât, diger memleketlerdeki icadiy birleşmelerniñ vekilleri ve gençler keldiler.

Cengiz Dağcını soñki yoluna ozğarmaq içün Türkiye Tışqı işler naziri Ahmet Davutoğlu reberliginde resmiy delegatsiya keldi. Aynı Ahmet Davutoğlunıñ areketleri ve yardımı sayesinde Cengiz Dağcınıñ Qırımğa ketirilmesi kerçekleşti. Türkiye delegatsiyasınıñ erkânında Türkiye Medeniyet naziri Ertuğrul Günay, Türkiyeniñ Ukrainadaki Vefqulade ve toluvekâletli elçisi Ahmet Bülent Meriç, belli qırımtatar tarihçısı, Ankaradaki Bilkent universitetiniñ professorı Haqan Qırımlı, Avraasiya Yazıcılar birliginiñ reisi Yaqub Deliomeroğlu, TÜRKSOY baş direktorı Düsen Kasseinov, Türkiye czumhuriyeti Nazirler şurası yanındaki TAT başqanı Kemal Yurtnaç, Türkiye ükümetiniñ vekilleri, Türkiye universitetleriniñ yolbaşçıları ve hadimleri, Türkiyedeki qırımtatar medeniyet ve yardımlaşma dernekleriniñ reisleri ve bir çoq resmiy şahıslar bar ediler.

Kebir camide üyle namazından soñ Cengiz Dağcınıñ cenaze namazı başlandı. Meclis reisi Mustafa Cemilev Türkiye tış işleri naziri Ahmet Davutoğlu ve Qırım musulmanlarınıñ müftisi haci Emirali Ablayev ile birlikte merhumnıñ tabutını qırımtatar milliy bayrağınen örttiler. Qırım musulmanlarınıñ müftisi haci Emirali Ablayev ve Türkiye Diyanet işleri idaresiniñ başı Mehmet Görmez beraberlikte cenaze namazını qıldırğanlarında qırımtatar, türk, ukrain ve britaniya bayraqları tiklendi.

Qırım müendislik-pedagogika universitetiniñ studentleri cenazege kelgenlerniñ episine Cengiz Dağcınıñ milliy bayraq üzerinde resimi olğan köküs nişanlarını taqtılar.

“Cengiz Dağcınıñ adı qırımtatar ve türk halqınıñ bütün nesilleriniñ hatırasında ebediyen qalacaq, – dedi Meclis reisi Mustafa Cemilev, cenaze namazında çıqışta bulunaraq. – Bizim ulu semetdeşimizniñ çoqtan-çoq eserleri sayesinde bütün dünya qırımtatar halqınıñ faciası – 1944 senesiniñ sürgünligi aqqında bildi. Cengiz Dağcı ve onıñ Vatan aqqında eserleri tuvğan yurtqa, doğğan yerge soñsuz sevginiñ parlaq nümünesidir. Yüce Rabbimiz Cengiz Dağcığa uzun ömür bağışladı ve o, şu ömürniñ büyük bir qısmını öz vatanı Qırımğa hızmetke bağışladı”, – dep, Mustafa Cemilev merhumnıñ ruhuna dua oqudı. Meclis reisi Türkiye Tışqı işler nazirine C. Dağcınıñ vasiyetini yerine ketirerek, onıñ dünyağa keldigi köyü Qızıltaşta defn etilmesini boynuna alğan ve becergeni içün teren minnetdarlığını bildirdi.

Qırım Nazirler Şurası reisiniñ muavini Georgiy Psarev da qırımtatar halqına taqdirniñ zulum iradesi ile ğurbette yaşamaq zoruna qalğan, amma bütün ömüri boyu öz halqı ve yurtuna hızmet etken ulu yazıcısınıñ vefatı munasebetinen teren taziyesini bildirerek, cümleden böyle dedi: “Qırım ve qırımtatarlar, Vatanğa ve anağa sevgi mevzusı Cengiz Dağcı eserleriniñ episinden keçe. Qırımğa qaytqan ve daa qaytmağan qırımtatarları içün onıñ eserleri milliy özgünlikni qorçalav yolunı kösterir”

“Halqnıñ ulu evlâtlarınıñ cenazesi – bu epimiz içün faciadır, – dedi belli qırımtatar tarihçısı, Ankaradaki Bilkent universitetiniñ professorı Haqan Qırımlı.- Amma bugün bu qırımtatar ve türk edebiyatı klassiginiñ Vatanğa qavuşuv künüdir. Yazıcı Dağcı qayerde yaşamasın, nerede bulunmasın Qırım daima onıñ qalbinde edi, Türkiyeli musafirler, Türkiye Tışqı işler naziri A. Davutoğlu ve Medeniyet naziri E. Günayğa ve olarnıñ yüzünde Türkiye Cumhuriyetine Cengiz Dağcını Vatanına qavuştırğanı içün büyük teşekkürlerini bildirgen professor Hakan Qırımlı: “Alla Türkiye ve türk halqından razı olsun”, dep dua etti.

Türkiye cumhuriyetiniñ naziri Ertuğrul Günay Qırım bugün çoq yıllar Vatanı, halqına asretlik içinde yaşağan oğlu Cengiz Dağcını qarşılağanını qayd etip, onıñ yurtqa ve anağa sevgisi ibretke lâyıq olğanını ayttı.

Türkiye Tışqı işler naziri Ahmet Davutoglu Türkiye halqı, Türkiye Prezidenti ve Türkiye ükümetiniñ yolbaşçıları adından Cengiz Dağcınıñ soy-aqrabalarına, bunıñ kibi de bütün qırımtatar halqına baş sağlığı tiledi. “Eserleri bir çoq nesillerni terbiyelegen qalemi ustasına şukran bildirmek bizim borcumızdır. Cenazede bulunmaq – bu, Dağcığa onıñ edebiyatqa qoşqan issesi içün bizim minnetdarlığımızdır”, – dedi Davutoğlu. Türkiye Tışqı işler naziri Ahmet Davutoglu Cengiz Dağcınıñ vefatı aqqında haberni diger ulu Cingiz – qırğız halqınıñ ulu evlâdı Cingiz Aytmatovnıñ tuvğan yurtu Qırğızstanda resmiy ziyaretnen bulunğan vaqtında aldı. Nazirniñ aytqanına köre bu eki yazıcınıñ eserleri onıñ dünyabaqışınıñ şekillenmesine büyük tesir etkenler.

Cenaze namazından soñ matem tedbiriniñ iştirakçileri yazıcını Qızıltaş köyüne ozğarıp kettiler. C. Dağcı Yalta civarındaki Qızıltaş köyünde topraqqa berildi.

Merhum defn etilgen soñ Qırımtatar halqı Meclisiniñ reisi Mustafa Cemilev ve Türkiye Tışqı işler naziri Ahmet Davutoğlu Cengiz Dağcınıñ qız qardaşı – Ayşe hanım ve yaqın aqrabalarına taziye bildirip, baş sağlığı tilediler.

Ukraina Prezidentiniñ Qırımdaki daimiy temsilcisiniñ vazifesini eda etken Viktor Plakida ve Qırım Nazirler Şurası reisiniñ muavini Georgiy Psarev yazıcınıñ qabirine çeçek qoydılar.