PASE reisi Mevlüt Çavuşoğlu ve Meclis reisi Mustafa Cemilevniñ körüşüvi

17 Sentâbr 2011

Körüşüvde PASE reisi ve Türkiyeniñ Avropa Birligi işleri boyunca naziri Egemen Bağış ile Meclis yolbaşçıları qırımtatar halqınıñ vaziyeti ve halqara cemaatçılıqnıñ rolü aqqında qonuştılar. 

Qırımğa Yalta Avropa strategiyasınıñ(YES)  8-nci forumında iştirak etmek içün kelgen Avropa Birligi Parlament Assambleyasınıñ reisi Mevlüt Çavuşoğlu, Türkiyeniñ Avropa Birligi işleri boyunca naziri Egemen Bağış, Türkiyeniñ Ukrainada Toluvekâletli ve Vefqulade  elçisi  Ahmet Bülent Meriç ve olarnıñ yanında bulunğan şahıslar sentâbr 16 kününi deyerlik tolusınen Bağçasaray ile tanış oluv ve Qırımtatar halqı Meclisiniñ yolbaşçılarınen körüşüvge bağışladılar.  

Bağçasaray şeeriniñ sakinleri olğan dindaşlarınen beraber cuma namazını qılğan nufuzlı musafirler  Meclis reisi Mustafa Cemilev, Bütündünya qırımtatarlar kongressiniñ prezidenti Refat Çubarov, Bağçasaray rayon devlet memuriyetiniñ başı İlmiy Ümerov, Bağçasaray regional meclis reisi Ahtem Çiygoz ve Meclisniñ tışqı alâqaları bölüginiñ reberi Alim Hamzinniñ ozğaruvında Hansaraynı ziyaret ettiler ve Qırım jurnalistlerinen subetleştiler,

Soñra “Markur” restoranında Türkiyeniñ Ukrainada Elçiligi tarafından berilgen yemek vaqtında Meclis reisi Mustafa Cemilev, Bütündünya qırımtatarlar kongressiniñ prezidenti Refat Çubarov PASE reisi ve Türkiyeniñ Avropa Birligi işleri boyunca naziri Egemen Bağış ile Meclis yolbaşçıları qırımtatar halqınıñ vaziyeti ve halqara cemaatçılıqnıñ rolünen bağlı meselelerni muzakere etmek imkânına nail oldılar.