Mustafa Cemilev ve Vitaliy Kliçkonıñ körüşüvi

16 Sentâbr 2011

2011 senesi sentâbr 16 künü Yaltada Qırımtatar halqı Meclisiniñ reisi Mustafa Cemilev ve onıñ birinci muavini  Refat Çubarov “UDAR” siyasiy partiyasınıñ yetekçisi  Vitaliy Kliçko ile körüştiler.

Körüşüvde bunıñ kibi de  “UDAR” siyasiy partiyası yetekçisiniñ muavini   Vitaliy Kovalçuk, Meclis tışqı alâqalar bölüginiñ başı  Ali Hamzin, Meclis azası Zaur Smirnov ve  Yalta regional meclisiniñ azası Üsein Çapuh iştirak ettiler.

Dostane subet devamında Mustafa Cemilev ve Vitaliy Kliçko cemiyet inkişafınıñ müim problemlerini çezüv maqsadında Ukrainadaki içtimaiy-siyasiy vaziyet ve Ukrainadaki milliy demokratik küçlerniñ birlikte areketleriniñ istiqballeri boyunca fikir paylaştılar. Körüşüv iştirakçileri şunı memnünliknen qayd ettiler ki,  Ukrainanıñ mustaqil demokratik devlet oldaraq inkişaf etmesi ve Avropa halqları arasında munasip yer almasını kerçekleştirüv boyunca bütün printsipial meselelerde fikirler birdir.

 “Qırımtatar halqı ve onıñ milliy areketi demokratiyağa meyil bergen, diger halqlarnıñ degerliklerini sayğan  şanlı tarih saibidir. Şunıñ içün de biz Ukrainada demokratiyanıñ tiklenmesini teminlegen bütün saalarda sizlernen beraber areket etmege ister edik”, – dedi  “UDAR” siyasiy partiyasınıñ yetekçisi  Vitaliy Kliçko.

“Biz “UDAR” siyasiy partiyasınıñ Ukrainanıñ Avropa birligine qatılmasını teminlegen areketlerini begenemiz. Fikrimizce bu, qırımtatar halqı uquqlarınıñ tiklenilmesine irişmek imkânını yaratır.  Qırımtatar halqı Qurultayınıñ qararları esasında faaliyet köstergen Qırımtatar halqınıñ.

Meclisi , UDAR” siyasiy partiyasınıñ tekliflerini, olar qırımtatar halqınıñ menfaatlarını da olduqça esapqa alğanları taqdirde,  Qırımda  amelge keçirmesine qoltutmağa azır “, – dep qayd etti Meclis reisi Mustafa Cemilev.

 Körüşüvniñ soñunda onıñ iştirakçileri Qırımtatar halqınıñ Meclisi ve “UDAR” siyasiy partiyası arasında eki tarafqa da elverişli meseleler oğrunda sıqı çalışmaqnı añlaştılar.