Meclis reisi Mustafa Cemilev Avropa qomşucılığı siyaseti ve kenişleştüv meseleleri boyunca Avropa komissiyasınıñ komissarı Ştefan Füle ile körüşti

15 Sentâbr 2011

Meclis reisi Mustafa Cemilev  2011 senesi sentâbr 15 künü  Avropa qomşucılığı siyaseti ve kenişletüv meseleleri boyunca Avropa komissiyasınıñ komissarı  Ştefan Füle ile körüşti.  Şu künü Mustafa Cemilev Qırımtatar halqı Meclisiniñ ofisinde   Avropa Birliginiñ Avropa qomşucılığı siyaseti ve kenişletüv meseleleri boyunca Avropa komissiyasınıñ komissarı  Ştefan Füle yolbaşçılığındaki delegatsiyanı qabul etti.

Avropa Birligi delegatsiyasınıñ erkânına  Ukraina Avropa komissiyasınıñ başı Joze Manuel Pintu Teyşeyra, Avropa Birligi komissarı kabinetiniñ azası İvon Pyürko,Avropa qomşucılığı siyaseti koordinatsiyası bölüginiñ reberi  Madlen Mayorenko, Avropa tışqı faaliyetler hızmetiniñ Şarq bölügi mütehassısı Kelin Ungur, Avropa Birligi komissarınıñ matbuat kâtibi Anka Paduraru, Ukrainada Avropa Birligi temsilciligi siyasiy bölüginiñ başı Hannes Şrayber, Ukrainada Avropa Birligi temsilciliginiñ siyasiy attaşesi  Fabiola Di Klemente, Ukrainada Avropa Birligi temsilciliginiñ Qırımda işbirlik boyunca beraberlikte teşebbüsi  yöneticisi  Entso Damyani ve Ukrainada Avropa Birligi temsilciliginiñ matbuat kâtibi David Stulik kirdiler.

Qırımtatar halqı Meclisi tarafından körüşüvde Meclis reisiniñ birinci muavini  Refat Çubarov, Meclis Kâtibiyetiniñ başı  Zair Smedlâyev ve tışqı alâqalar bölüginiñ reberi  Ali Hamzin iştirak ettiler.

 Nufuzlı musafirlerni samimiy selâmlağan Meclis reisi  Mustafa Cemilev Avropa Birligi komissarı Ştefan Fülege Avropa devletleri ve halqları arasında işanç ve özara añlaşuvnı pekitkeni içün teşekkür bildirip, qırımtatar halqı kerçekten de bugün  halqara cemaatçılıqnıñ ve başta bir Avropa institutlarınıñ qolututuvına muhtac olğanını qayd etti. “Qırımtatar halqınıñ Meclisi Avropa Birligi ve Avropa Parlamentiniñ deputatlarınen özara emekdaşlıqqa pek yüksek qıymet kese. Qırımtatar halqı meclisi ve Avropa Birligi institutları arasında esasen Ukrainada Avropa Birligi temsilciliginiñ sayesinde meydanğa kelgen açıq ve muntazam dialog biz içün ğayet müimdir”, -dedi Mustafa Cemilev.

Qırımtatar halqınıñ qaytuvı, yerleşüvinen bağlı bir çoq meseleler boyunca keniş muzakere devamında  Meclis reisi Mustafa Cemilev Avropa Birligi komissarı Ştefan Füleniñ diqqatını Ukraina parlamenti qırımtatar halqına nisbeten yapılğan cinayetniñ aqibetlerini yoq etüvge doğrultılğan mahsus qanunlarnı qabul etmegenine celp etti. Bunıñ neticesinde  daa bayağı qısmı sürgünlikte bulunğan qırımtatar halqınıñ ağır vaziyeti beterleşmekte.  

Avropa qomşucılığı siyaseti ve kenişleştüv meseleleri boyunca Avropa komissiyasınıñ komissarı  Ştefan Fülege muracaat eterek Meclis reisi Mustafa Cemilev  qayd etti ki, qırımtatar halqınıñ millet olaraq yoq olmasına ketirecek bu vaziyetke halqara ve Avropa cemaatçılığı lâqayd qalıp olamaz.  Aynı zamanda, devam etti Mustafa Cemilev, qırımtatar halqınıñ meselesini adaletli çezüvde Avropa Birliginiñ azası olmağa tırışqan ukrain devleti de halqara cemaatçılıqnıñ yardımına muhtacdır.

 Meclis reisi Mustafa Cemilev Avropa Birliginiñ komissarı Ştefan Füleni qırımtatar halqınıñ öz vatanında aq-uquqlarını ğayrıdan tiklev, Ukrainada onıñ telükesizligini teminlev meseleleri  boyunca halqara forumğa azırlıqnıñ ketişatınen tanış etti.  

Halqara forum mevzusını devam ettirgen Mecis reisiniñ birinci muavini Refat Çubarov qayd etti ki, 2011 senesi oktâbr 5 künü Meclis reberleriniñ  Ukrainada akkreditatsiya yapılğan elçilik ve halqara teşkilâtlar temsilciliginiñ yolbaşçılarınen olacaq körüşüvde Halqara forumnıñ köntseptsiyası muzakere etilecek.  “Ukraina Prezidentiniñ Memuriyeti, Ukraina Nazirler Kabineti ve Ukraina Yuqarı Şurasınıñ vekilleri de davet olunğan bu körüşüv vaqtında qırımtatar halqınıñ aq-uquqlarını tolusınen amelge keçirmek imkânını bere bilecek özüne has halqara “yol haritası”nı işlemek maqsadında biz Halqara forum iştirakçileri köterecek meselelerni muzakere etecekmiz. Bu körüşüvde Ukrainada Avropa komissiyası Vekâletliginiñ başı Joze Manuyel Pintu Teyşeyranıñ iştirak etmesi biz içün büyük yardım olur, – dedi Refat Çubarov.

 Avropa qomşucılığı siyaseti ve kenişletüv meseleleri boyunca Avropa komissiyasınıñ komissarı  Ştefan Füle  Qırım Muhtar Cumhuriyeti yolbaşçılarınen körüşüvleri semereli netice berecegine eminligini bildirdi. “Muhtariyet Nazirler şurası bizge Qırım inkişafınıñ bütün  meseleleri, şu cümleden Avropa Birligi leyhalarınıñ  Qırımda amelge keçirilmesi, Qırımda yaşağan milliy cemiyetlerniñ uquqları ve menfaatları esapqa alınğanı alda baqılacağına söz berdiler”, dedi   cenap Ştefan Füle.

 Avropa Birliginiñ Komissarı Ştefan Füle Qırımtatar halqınıñ öz vatanında aq-uquqlarını ğayrıdan tiklev, Ukrainada onıñ telükesizligini teminlev meseleleri  boyunca halqara forum keçirüv ğayesine qoltutaraq,   insan uquqları ve milliy cemiyetlerniñ aqlarını teminlev oğrunda yapılğan er angi adım qoltutuvğa lâyıqtır, dep qayd etti.  Bunıñ kibi de Komissar  Halqara forumnı keçirüv meselesi boyunca bütün menfaatdar taraflar, şu cümleden ÖBSE ile muşavereler keçirecegini bildirdi. Avropa Birligi  Komissarı  Ştefan Füle Qırımtatar halqınıñ Meclisi  Halqara forum keçirilmesiniñ  zarurlığını  ukrain ükümetine añlata bilir. Forum ise qırımtatar meselesiniñ çezimine yañı bir siltem olur.

“Teşebbüsleriñizge ükümetni de celp etüv ğayet müimdir, – devam  etti sözüni Komissar. Bizim teşkilâtlarımıznıñ rolüne kelsek, olar endi belgilengendir. Qırımtatarlarnıñ meselesi Ukrainanıñ içki ceryanıdır ve onıñ içün birinci nevbette Ukraina mesülietlidir”. Bu yerde cenap Füle  Meclis ile dialognı devam ettirmege azırlığında işandırıp, Avropa institutları halqlarnıñ demokratik aqları ve serbestliklerini qoruv oğrunda çalışqanlarını qayd etti.