Leonid Kuçma Qırım müendislik-pedagogika universitetiniñ studentlerine öz fondunıñ stpendiyalarını taqdim etti

12 Sentâbr 2011

2011 senesi sentâbr 12 künü Qırım müendislik-pedagogika universitetinde  “Prezidentskiy fond Leonida Kuçmı “Ukraїna” (Leonid Kuçmanıñ “Ukraїna” prezident fondı) hayriye teşkilâtı tesis etken stipendiyalarnı taqdim etüvniñ tantanalı merasimi olıp keçti. Universitetniñ istidatlı gençlerine stipendiyalarnı şahsen taqdim etmek içün  “Ukraїna” fondınıñ esasçısı, Ukrainanıñ ekinci prezidenti (1994-2005 ss.) Leonid Kuçma teşrif buyurdı.

Leonid Kuçmanıñ “Ukraїna” prezident fondı mına endi yedi yıl devamında keçken oquv yılnıñ yekünlerine köre ukrain aliy oquv yurtlarınıñ eñ yahşı studentlerini taqdirlemekte. Birinci nevbette tehnikiy ishtisas ve çeşit kurslarğa emiyet berile. 

Tantanalı tedbirni açqan QMPU rektorı, professor Fevzi Yaqubovnıñ aytqanına köre universitetniñ alimler keñeşi  “Ukraїna” fondunıñ bu mukâfatına lâyıq studentlerniñ cedvelini gizli rey berüvnen belgilep,eñ alâ talebelerni seçti. Bunıñ kibi de Fevzi Yaqubov qayd etti ki, Leonid Kuçma universitetniñ eñ sayığılı musafirlerinden biri olaraq, QMPUnıñ birinci fahriy doktorlar sırasından yer aldı. “Bugünde-bugün Leonid Daniloviç sayesinde Ukrainada universitetimizni bileler ve tanıylar”, – dep qayd etti rektor Yaqubov.

Er oquv yılı sekiz aliy oquv yurtnıñ elliden ziyade studenti mezkür stipendiyağa nail ola. Er bir universitetten 5-şer, 10-ar student seçile.  Cedvelde yer alğan QMPUnıñ beş studenti qazanğan stipendiyalarını “Ukraїna” fondınıñ teesisçisi Leondi Daniloviçnıñ şahsen elinden aldılar. Stipendiya saipleri oquv yılı devamında alacaq 10 800 grivnâ stipendiyasını oquvğa sarf eteceklerini bildirdiler. 

Studentlerni hayırlağan  Leonid Kuçma QMPU professorlar ve ocalar em de studentlerniñ böyle samimiy ve sıcaq qabullarınen ğayet memnün olğanını qayd etti.  “Ukrainanıñ zekâviy ömürinde ayını siziñ universitetiñizniñ vekilleri faal iştirak etkeni yüksek neticeleriñizden delâlet bere.  Toqtamañız, daa yükseklerge tırışıñız”, – dedi Leonid Kuçma studentlerge hıtap eterek. Leonid Kuçma gençlerniñ arasında eñ cesaretlileri  ukrain dünyabaqışındaki  durğunlıqnı yeñe bileceklerine eminligini bildirdi. “Siz  memleketimizni degil tek coğrafik köstergiçleri içün, belki cianğa qoşqan issesi içün ürmet etilgen devletke çevirmek borclusıñız”, -dedi Kuçma.

Leonid Kuçma şahsen davet etken Qırımtatar halqı Meclisiniñ reisi Mustafa Cemilev de istidatlı yaşlarnı mukâfatlav tantanalı merasiminde iştirak etti. Tedbir musafirleri arasında  Qırım Yuqarı Şurası reisiniñ muavini  Grigoriy İoffe, Qırım Nazirler Şurası reisiniñ muavini Aziz Abdullayev, Ukraina Prezidentiniñ Qırımdaki daimiy temsilcisi vazifesini eda etici  Viktor Plakida, Qırım Yuqarı Şurası  Milletlerara munasebetler ve sürgün etilgen grajdanlarnıñ meseleleri boyunca daimiy komissiyanıñ reisi Remzi İlyasov bulundılar.

Resmiy qısımdan soñ  universitetniñ icadiy kollektivleri  musafirlerge eñ yahşı çıqışlarını ediye etip, Qırım yarımadasında yaşağan cemi milletlerniñ ömün ve yırlarını icra ettiler.