Avropa ve Qırımnıñ yaş alimleri Meclis reisi M. Cemilevnen körüştiler

10 Sentâbr 2011

Sentâbr 5-ten 10-na qadar Aqmescitte “Demokratiya i identiçnost v postsovetsköy Ukraine: krımskiy köntekst” mevzusında halqara yazlıq mektebi çalıştı. Qırım, Almaniya, Avstriya, İsveçre ve Finlândiya aliy oquv yurtlarınıñ ocaları, aspirant ve talebeleri Mektepniñ iştirakçileri oldılar.

Tedbirler çerçivesinde mektep iştirakçileri Qırımdaki çeşit siyasiy-içtimaiy teşkilâtlarnen körüştiler, qırımlı siyasetçiler, ekspert ve tarihçılarnen qonuştılar, bunıñ kibi de Qırımnıñ yadikârlıqlarını da ziyaret ettiler.

Halqara mektep vekilleriniñ Qırım ziyareti programmasında genç alimlerniñ Qırımtatar halqı Meclisiniñ reisi Mustafa Cemilev ile körüşüvleri de planlaştırılğan edi. Sentâbr 9 künü Meclis ofisinde M. Cemilev ile körüşüv samimiy müitte keçip, Qırım ve Ukrainanıñ ömürindeki müim siyasiy-içtimaiy ve medeniy-milliy meseleler boyunca fikir paylaşıldı.

Siyasiy ilimler namzeti, Vernadskiy adına Tavriya milliy universitetiniñ ocası Elmira Muratova bildirgenine köre Halqara mektepni Vernadskiy adına Tavriya milliy universiteti, Gumboldt adına Berlin universiteti ve Almaniyanıñ akademik almaşuvlar hızmeti teşkil ettiler. “Bizim seminarımız Qırım özgünliginiñ şekillenüv ceryanınen tanışuvğa bağışlanıp, çeşit milliy gruppalarnı qavrap ala, – devam etti E. Muratova. Mektep iştirakçileri Qırımnıñ çeşit siyasiy teşkilâtları, şu cümleden Meclis vekillerinen de körüşmek imkânına nail oldılar. Amma belli uquqqoruyıcı, dissident, Milliy Meclis reisi Mustafa Cemilevnen körüşmek, Ukraina ve umumen dünyada olğan vaqialarğa onıñ noqtai-nazarını diñlemek yaş alimler içün büyük şereftir. Bir çoq ilmiy konferentsiya ve körüşüvler devamında sabıq sovetler alanında demokratiyanı tiklev ve inkişaf ettirüv mevzusı açılğanda M. Cemilevniñ adı mıtlaqa añılır edi”

Öz nevbetinde musafirlerni Meclis ofisinde qarşılağan Mustafa Cemilev qayd etti ki, qırımtatarlar öz meselelerini cian meydanına, bilhassa yaş ve istiqballi alimler buña meraq kösterseler, çıqarmağa azır. “Qırım kerçekten de Qaradeñizboyu regionları arasında eñ pıtraqlısıdır, mında olğan adiseler adeti üzre bir qaç devletlerde öz aksini tapa”, – dedi M.Cemilev.

Gumboldt adınaBerlin universitetiniñ sotsiologiya ilimleri fakultetiniñ aspirantı, “Ukrainada içtimaiy-siyasiy davalarnıñ kerginleşmesinde elitanıñ rolü” mevzusı üzerinde çalışqan Yulâ Erner, Meclis liderine muracaat eterek ayttı ki, mektep iştirakçileriniñ çoqusına Qırım ealisiniñ eki esas gruppası yani musulmanlar ve slavânlarnıñ turmuşı, degerlikleri boyunca fikirleriniñ şekillenmesine yarımada şeerleri boylap seyahatlar yardım etti.

Meclis reisi, Ukraina halq deputatı M. Cemilev ile tafsilâtlı subet devamında dialog iştirakçileri Ukrainanıñ Avropağa qatıluvı ve bu adımğa ealiniñ munasebeti, qırımtatar halqı vekilleriniñ Ukraina devlet, cumhuriyet organlarında temsil etilüvi muzakere olundı.

M. Cemilev berilgen ve köterilgen iç bir sualni diqqatsız qaldırmadı, er birine etraflıca cevap berdi ve şunı da qayd etti ki, qırımtatarlar Ukrainanıñ Avroatlantik qatılmasınıñ tarafdarlarıdır.