Meclis reisi Mustafa Cemilev Korrespondent mecmuasınıñ «TOP- Ukrainada eñ nufuzlı 100 insan» reytingi neticelerine izaat berdi

02 Sentâbr 2011

Meclis reisi Mustafa Cemilev Korrespondent  mecmuasınıñ “TOP- Ukrainada eñ nufuzlı 100 insan” reytingi neticelerine izaat berdi.  Malüm olğanına köre  reytingge faqat eki qırımlı kirsetilip, Qırım Yuqarı  Şurasınıñ reisi  Vladimir Konstantinov 68-nci yerde, Qırımtatar halqı Meclisiniñ reisi, Ukraina halq deputatı Mustafa Cemilev ise  79-ncı yerni qazandı.

 “Böyle kibi reytinglerge şahsen men şübeciliknen baqam, çünki insannıñ nufuzlılığı nasıl ölçülernen belgilengenini bilmeyim.  Kendimi öyle insanım, dep saymayım, – dedi Meclis yolbaşçısı. – Mende nasıldır liderlik hususiyetler bar, dep bellemeyim. Amma  öyle oldı ki, men milliy areketke yetekçilik yaptım ve qırımtatar halqınıñ birligi, faaliyetini öz vekâletli organı Meclis ile alıp barğanı sayesinde bir çoq mesele ve problemlerni davasız çeze bilemiz”.

Bundan da ğayrı, Cemilev qırımtatar halqınıñ milliy areketine Qırımnıñ tışında da yüksek qıymet keskenlerini hatırlattı. Misal olaraq ise M. Cemilev çetel ziyaretleriniñ birinde olğan vaqianı tarif etti:. “Amerikada Corc Vaşington adına universitette çıqış yapqan vaqtımda anda bulunğan ekspertlerden biri dedi ki, sabıq SSSRde bir çoq milliy areketler bar edi, lâkin olar parçalandı ve biri-birinen davalaştılar. Ve tek bir qırımtatar halqınıñ milliy areketi özüniñ demokratik pozitsiyası ve qattı printsipleri, öz vaqtında milliy qurultay keçirgeni ve vekâletli organını saylağanı sayesinde bölünmedi, aksine daa da quvetleşti”.  

M.Cemilevniñ fikrince böyle reytingler  Mustafa Cemilevniñ hızmeti degil. Qırımtatarlar vaqıtnı qaçırmadan demokratik saylav keçirip, halqnıñ özü seçken demokratik organnı meydanğa ketirdi ve saylavlar açıq ve adaletli olmasını temin etti.