Yarkoye köyünde caminiñ temel taşı qoyuldı

21 Avgust 2011

Avgust 20 künü  Saq rayonındaki Yarkoye köyünde qurulacaq caminiñ temel taşı qoyuldı.  Bu munasebetler teşkil etilgen tantanalı tedbirde Qırım musulmanlarınıñ müftisi  hacı Emirali Ablayev, Bütündünya qırımtatarlar kongressiniñ prezidenti, Milliy Meclis reisiniñ birinci muavini  Refat Çubarov,  Saq regional meclisiniñ reisi  Zevcet Qurtümerov,  Saq rayonınıñ imamı Emirasan Ümerov,  Saq rayon musulman cemiyetinin6 reisi  Seytasan Asanov,  Yarkoye, Krımskoye, Yuqarı-Cami (Valentinovo), Aşağı-Cami (Geroyskoye) köyleriniñ sakinleri iştirak ettiler.

Tantanalı tedbir musulman adeti boyunca duanen başlap, onı Saq rayonınıñ imamı Emirasan Ümerov oqudı.  Duadan soñ milliy gimn sedası altında  on beş metr yükseklikke milliy bayraq köterildi.

 Temel taşını qoymaq içün Müftiy Emirali Ablayev ve Refat Çubarov davet etildiler, olar ise öz nevbetinde  şu yerde bulunğan balalarnı çağırdılar.

Müftiy Emirali Ablayev, Refat Çubarov, Zevcet Kurtumerov i Seytasan Asanov Yarkoye köyüniñ musulmanlarını hayırlap, nasiatlarda bulundılar.

Tedbirniñ resmiy qısmından soñ kontsert başlandı. İstidatlı yaş  yırcılar Emine Mustafayeva ve Ayşe Veliyeva, bunıñ kibi de  Yarkoye köyüniñ “Fidanlar” ansambli er kesni hoşnut ettiler.

 Tedbirniñ soñunda aqşam namazı qılınıp, er kes Saq rayonınıñ iş adamları Eskender Bilâlov ve Dilâver Seythalilov teşkilâtlandırğan iftarğa davet

etildi.

 Köyniñ imamı Server Acimambetov qayd etkenine köre, caminiñ temel taşını aynı Ramazan ayında qoymaq qarar berildi ki, başlanğan iş hayırlı ve oğurlı olsun.

“Cami qurucılığı içün ayırılğan 5 sotka yerde qırımtatar ve rus tillerinde “Mında Yarkoye köyüniñ camisi qurulacaq” degen sözler yazılğan temel taşı qoydıq ve bayraqnı 15 metr yükseklikke köterecek direk tikledik. Milliy bayrağımız daima yelpirep turacaq”, – dedi imam.

Ayder Acimambetov