Menu 
Qırım musulmanlarınıñ müftiligi Vasiliy Cartınıñ vefatı munasebetinen taziye bildire
17 Avgust 2011
Qırım musulmanlarınıñ diniy idaresinde Qırım nazirler Şurasınıñ reisi Vasiliy Cartınıñ apansızdan vefat etkeni aqqındaki haberni keder ile qabul ettiler.
Vasiliy Cartı insanlar hatırasında sözüniñ aqiqiy saibi, iradeli ve ğayretli bir adam olaraq ebediy qalacaq
Qırım Nazirler Şurasınıñ reisi vazifesinde çalışqan Vasiliy Cartı çoqmilletli ve çoq dinler olğan Qırımnıñ tınçlığınen bağlı bir sıra mürekkep meselelerniñ çezilmesine reberlik yaptı. Vasiliy Cartı açıq ve musaviy subetke azır olğanı sayesinde Qırımda yaşağan bütün sakinlerniñ menfaatları ve aqlarını qorçalağan munasip qararlar alındı.
Vasiliy Cartı, dindar adam olaraq Qırımda yaşağan er angi din vekilleriniñ itiyaclarına sayğı ve ürmet, diqqat ile yanaşa edi. Qırım musulmanlarınıñ minnetdar hatırasında Vasiliya Cartınıñ adı Cuma cami qurulacaq yerni belgilevge şahsiy isse qoşqan, qomşuları ve semetdeşleriniñ dini ve urf-adetlerini ürmet etken insan temsili olaraq qalacaq.
Qırım musulmanlarınıñ müftiligi Vasiliy Cartınıñ yaqınları ve dostlarına başlarına tüşken müsibet ile teren taziyesini bildire
