Meclis azaları Avropa Birliginiñ Ukrainadaki Temsilciliginiñ başı Joze Manuel Pintu Teyşeyra ile körüştiler

13 Avgust 2011

2011 senesi avgust 11 künü Bağçasarayda Bütündünya qırımtatarlar kongressiniñ prezidenti, Meclis reisiniñ birinci muavini Refat Çubarov Avropa Birliginiñ Ukrainadaki Temsilciliginiñ başı, elçi Joze Manuel Pintu Teyşeyra ile körüşti.

Körüşüvde AB Ukrainadaki Temsilciliginiñ yerli ve regional inkişaf leyhalarınıñ yolbaşçısı Entso Damiani ve Meclisniñ tışqı alâqalar bölüginiñ başı Ali Hamzin.

Körüşüvde Qırımtatar halqınıñ öz Vatanında aq-uquqlarını ğayrıdan tiklev boyunca halqara forumğa azırlıq körüvnen bağlı meseleler baqıldı.

Avropa Birliginiñ Ukrainadaki Temsilciliginiñ başı, elçi Joze Manuel Pintu Teyşeyra şunı qayd etti ki, mezkür körüşüv Avropa parlamentiniñ prezidenti Yeji Büzekniñ avalesine köre keçirilmekte. Bu, onıñ ve Avropa parlamenti deputatlarınıñ adına Meclis reisi Mustafa Cemilev yollağan mektüpke cevabıdır. Öz muracaatında Meclis reisi qırımtatar halqınıñ bugünki vaziyetini tarif eterek, yaqın vaqıtta qırımtatar halqınıñ öz Vatanında aq-uquqlarını ğayrıdan tiklev, onıñ Ukrainada telükesizligi ve inkişafını teminlev boyunca halqara forum ötkerilmesiniñ lâzimligini deliller esasında añlattı.

Halqara forumnı azırlav ve ötkerüvnen bağlı meseleler boyunca Qırımtatar halqı Meclisiniñ noqtai nazarını beyan etken Refat Çubarov “Halqara forum keçirilmesiniñ zarurlığını añlağan Ukraina ükümeti de müsbet qarar alır, çünki qırımtatar halqınıñ yerleşüvi ve inkişafınen bağlı meseleler çezilmesiniñ sozulması, qırımtatar halqınıñ aq-uquqlarını tiklev oğrunda ameliy areket yapmağanı Avropa birligine kirmege azırlanğan Ukrainanıñ ögge sürgen ğayelerine uymay”, dedi

Diger meseleler sırasında körüşüv iştirakçileri Qırım ve Ukrainada içtimaiy-siyasiy vaziyetnen bağlı soñki adiselerni de muzakere ettiler. Cümleden, Refat Çubarov Avropa Birliginiñ Ukrainadaki Temsilciliginiñ başı, elçi cenap Joze Manuel Pintu Teyşeyranı Qırımtatar halqı Meclisiniñ “Batkivşçina” siyasiy partiyanıñ lideri Yuliya Timoşenkonıñ tevqif etilmesi munasebeti ile beyanatınen tanış etti.

Körüşüv iştirakçileri Meclis ve Ukrainada Avropa Birligi Temsilciligi arasında olğan daimiy körüşüv ve fikir paylaşuvlarnıñ cemiyet inkişafı, qırımtatar halqı uquqlarınıñ tiklenmesi meseleleriniñ al etilmesinde büyük emiyetini qayd etip, bu işni devam ettirmek istegini bildirdiler.