Meclisniñ Ukraina sabıq baş naziri Yuliya Timoşenko tevqif etilmesi munasebetinen beyanatı

08 Avgust 2011

2011 senesi avgust 5 künü Kiyev şeeri Peçerskiy rayon mahkemesiniñ qararına binaen Ukrainanıñ sabıq baş naziri, “Batkivşçina” siyasiy partiyanıñ lideri Timoşenko Yuliya Vladimirovna tevqif etildi.

Kiyev şeeri Peçerskiy rayon mahkemesiniñ mezkür qararı mahkeme vaqtında qabul etildi. Albu ki, mahkemeniñ bütün iştirakçileri öz aqlarını qorçalavda musaviy uquqlarğa maliktirler. Amma mahkemede alınğan qarar ve onı eda etüvnen bağlı areketler, şu areketlerge ukrain cemiyeti, halqara teşkilât ve bir sıra devletlerniñ resmiy vekilleriniñ seslenmesi uquq bozulğanından ve Yuliya Timoşenko üzerinden mahkemeniñ siyasiy maqsadlarından delâlet bere.

Ukrainada demokratik ve musaviy uquqlı cemiyet printsipleriniñ tesbit etilmesi, insan uquqları ve serbestliginiñ teminlenilmesi içün sebatnen areket etken qırımtatar halqınıñ Meclisi Ukrainadaki cemi siyasiy ve içtimaiy küçlerni siyasiy sebep boyunca taqip etüvniñ toqtatılması oğrunda areketlerni büirleştirmege çağıra.

Qırımtatar halqı Meclisiniñ toplaşuvında qabul etildi.
2011 senesi avgust 7
Aqmescit ş.