Türkiyeniñ Eskişehir-Tepebaşi şeerinden kelgen delegatsiya Meclis ofisini ziyaret etti

28 Mart 2011

Türkiyeniñ Eskişehir-Tepebaşi şeerinden üç künlük iş ziyaretinen kelgen delegatsiya 2011 senesi iyül 28 künü Meclisniñ ofisine teşrif buyurdı. 

Eskişehir şeeri Tepebaşı belediyesiniñ başı Ahmet Ataç reberligindeki  23 adamdan ibaret delegatsiyanı, bunıñ kibi de Eskişehir  belediyesiniñ deputatlarını Bütündünya qırımtatarlar kongressiniñ prezidenti, Meclis reisiniñ birinci muavini Refat Çubarov, Meclis tışqı alâqalar bölüginiñ başı Ali Hamzin ve U çağırılış qırımtatar halqı Qurultayı Teftiş komissiyası reisiniñ vazifesini eda etken Qurtseit Abdullayev qabul ettiler.

Türkiyeli musafirlerniñ ikâye etkenine köre Eskişehirde eñ çoqsayılı qırımtatar cemiyeti (60 biñden ziyade) yaşamaqta, mezkür şeer Aqmescitnen qardaş şeerdir.

Türkiye delegatsiyasınıñ vekillerine qırımtatar halqınıñ bugünki vaziyeti, çezilmesi zarur olğan müim meseleler tarif  etildi. Musafirlerge hıtap etken  Refat Çubarov Qırım ve Türkiye şeerleri arasında er taraflı alâqalar  kenişletilmesiniñ müimligi qayd etti.  “Biz Qırımda şunı añlaymız ki, cemiyet içersinde daima dialog olmadan, cian ile, bilhassa qomşularnen,  işbirlik kenişletilmeden tuvğan toprağımızda barışıqlıq ve tınçlıqnı teminleyebilecek şaraitler de olmaz. Şu munasebetnen biz Eskişehir ve Aqmescit arasında sıqı bağlar qurulğanından memnünmiz” –  dedi Refat Çubarov.

Eskişehir şeeri Tepebaşı belediyesiniñ başı Ahmet Ataç Meclis hadimlerini samimiy qabul ve tafsilâtlı laqırdı içün minnetdarlıq bildirip,  ağımdaki aynıñ sentâbr ayında  Eskişehir şeer akimleri daa bir kere Qırımğa keleceklerini haber etti.

Aynı şu künü türkiyeli delegatsiya Zevcet Qurtümerov ve Ali Hamzinnen beraber öz evi olmağan 250 qırımtatar ailesi yaşağan yataqahaneni de ziyaret etti.