Qırımtatar halqı milliy areketiniñ veteranları Meclis reisi Mustafa Cemilevni “Adalet ışığı” mukâfatınen hayırladılar

14 Mart 2011

2011 senesi iyül 14  künü Qırımtatar halqı milliy areketiniñ veteranları Meclis ofisine kelip, dostane ve sıcaq müitte Qırımtatar halqı Meclisiniñ reisi, Nobelniñ Barışıqlıq mukâfatına namzet Mustafa Cemilevni “Adalet ışığı” mukâfatınen taqdirlengeni munasebetinen hayırladılar.

Belli ki “Adalet ışığı” mukâfatı maneviy, ahlâqiy ve medeniy yetekçiligi, cemiyette barışıqlıq ve demokratiya printsiplerini teşviq etkeni içün berile. Çıqışta bulunğan veteranlar qırımtatar halqınıñ aliy vekâletli organınıñ reisi böyle yüksek ve nufuzlı mukâfatnen taqdirlenmesi Qırımtatar halqı milliy areketiniñ tarihında da müim bir vaqia olğanını qayd ettiler. “Bu mukâfat, barışıqlıq ve insan uquqlarını qorçalavda Mustafa Cemilevniñ rolü ve emiyeti añlanmasınıñ daa bir basqıçı demektir, – dedi Meclis azası  Zevcet Qurtümerov.

Şu künü Meclis reisiniñ musafirleri arasında çoqyıllıq uquqqoruv faaliyeti devamında, qırımtatarlarnı vatanğa qaytaruv oğrunda küreşniñ ağır sınavlar devrinde ve em de quvançlı daqqalarda onıñ ile beraber  bulunğan Zampira Asanova, Şefiqa Konsul, Veciye Kaşka, Rollan İslâmov, Lir Halilov, Ediye Muradasıl, Fadmeşerfe Mambetova, Lenara Ümerova, Ferasultan Muslâdinova, Mambet Üseinov, Zevcet Qurtümerov, Gülizar Yunusova ve Meclis azası Ali Hamzin bar ediler.

Malümat içün:

Ukraina-Kanada jüri eyyetiniñ qararı boyunca 2011 senesi “Adalet ışığı” mukâfatınıñ saibi olaraq belli uquqqoruyıcı, Qırımtatar halqı Meclisiniñ reisi, Ukraina halq deputatı, Nobelniñ Barışıqlıq mukâfatına namzet  Mustafa Cemilev tanıldı.

Mukâfatnen taqdirlevniñ tantanalı merasimi 2011 senesi iyül 9 künü Lvov vilâyet filarmoniyasında olıp keçti.