Qazahistanlı musafirler Qırımda

05 Mart 2011

2011 senesi iyül 4 künü Hoca Ahmed Yasavi adına Halqara Qazah-Türk universitetiniñ halqara munasebetler bölüginiñ müdiri Sauranbek Camalbekov ve azırlav bölüginiñ dekanı, filologiya ilimleri namzeti Nursaulet Aytbayevadan ibaret delegatsiyası Qırımtatar halqı meclisini ziyaret ettiler.

Qırımtatar halqı Meclisiniñ tasil ve medeniyet bölüginiñ başı, “Maarifçi” birleşmesiniñ reisi, Qırım Yuqarı Şurasınıñ deputatı Safure Kacametova ozğarıp kelgen musafirlerni Milliy Meclis reisi, Ukraina halq deputatı Mustafa Cemilev qarşılap aldı.

Sauranbek Jamalbekov ziyaretleriniñ maqsadlarını beyan etip, universitet rektorı, professor L.T.Taşimovnıñ milliy kadrlarnı azırlav ve maarif saasında işbirlik aqqında añlaşma tizmek ve imzalamaq teklifini bildirdi.

2003 senesinden itibaren universitet türk tilli halqlar içün oqumaq kvotaları ayırıp, er ayda 150 dollar stipendiya bere, yataqhanede yernen teminlev, bunıñ kibi de yılda bir kere poyezd, avtobus parasını ödey, studentlerge tibbiyay yardım köstere ve aq-uquqlarını qorçalay. 2011 senesi Halqara universitet maarif saasında milliy kadrlarnı azırlavda yardımcı olmaq niyetinen qardaş qırımtatar ve gagauz halqları içün de 5-şer kvota ve stipendiyalar ayıruv qararını aldı.

Mustafa Cemilev gençler menimseycek zenaat, ilim saasında iş, universitetniñ diger tasil müessiselernen alâqaları boyunca suallerge qanaatlendirici cevaplar aldı ve musafirlerge köstergen yardımları içün samimiy teşekkür bildirdi.

Qırımtatar halqı Meclisiniñ reisi uzurında Hoca Ahmed Yasavi adına Halqara Qazah-Türk universitet ve “Maarifçi” birleşmesi arasında Ukraina grajdanları olğan qırımtatar gençleri içinden mütehassıslarnı maqsadlı azırlav boyunca muqavele itmzalandı.

Malümat:
Qazahistan Cumhuriyetiniñ ükümeti ve Ukraina Nazirler kabineti arasında 2001 senesi sentâbr 26-da aliy malümatı ve ilmiy derece em de unvanlarnıñ eki taraflama tanılması aqqında añlaşma imzalanğan edi.

Qazahistan Cumhuriyetiniñ Prezidenti N.Nazarbayevniñ 1991 s. iyün 3-teki № 329 Fermanına binaen Turkestan devlet universiteti meydanğa ketirilip, türk dünyasınıñ ulu felsefecisi ve alimi Hoca Ahmet Yasaviniñ adı berildi. 1992 senesi oktâbr 31-de Türkiye ve Qazahistan arasındaki ükümetlerara añlaşma esasında Hoca Ahmed Yasavi adına Halqara Qazah-Türk universiteti açılıp, o tek Qazahistanda degil de bütün Asiyada birinci halqara oquv müessisesi oldı.

Universitette çeşit türk tilli memleket ve toplumlarnıñ vekilleri tasil almaqtalar. Bugünde-bugün universitette 14 649 student oqumaqta. Türk tilli devletlerden oquğan studentlerniñ sayısı 1000 adamnı teşkil ete.

Universitetniñ professor-ocalar erkânı yüksek ilmiy azırlıq seviyesine maliktir. Universitette Qazahistan İlimler milliy akademiyasınıñ 6 akademigi, 116 professor, ilim doktorları, 618 dotsent, ilim namzetleri ders bermekteler. Universitet 61 çeşit zenaat saiplerini azırlay. Universitetniñ unikalligi şunda ki, gumanitar zenaatlarnen bir sırada mında devletni idare etüv, iqtisadiyat, aktör, ameliy sanat, horeografiya, milliy muzıka sanatı, etnologiya, turizm, arheologiya ve diger saalarında mütehassıslar da azırlanıla.

Universitet terkibinde 4 institut çalışa:

• Türkşınaslıq ilmiy-tedqiqat institutı;
• Ekologiya ilmiy-tedqiqat institutı;
• Arheologiya ve etnologiya ilmiy-tedqiqat institutı;
• Tibbiyat institutı.

Tibbiyat institutı yanında umumiy tibbiyat, pediatriya, stomatologiya ve şarq tibbiyatı bölükleri faaliyet köstermekte. Tibbiyat institutınıñ bazasında 90 yerli zemaneviy tehnika ile donatılğan klinika çalışmaqta

Universitetniñ maddiy-tehnikiy bazası yüksek keyfiyetli seviyededir. İlmiy laboratoriyalar zemaneviy aletler ve tehnika, mahsus kompyuter sınıfları ve suratı saniyede 10 Mbit olğan internet ile teminlengendir. Uzaqtan oqutuv sisteması da areket ete. Universitetniñ oquvnı çetelde devam ettirmek istegen mezunlarına yollanmalar berile.