Ay-Serezde köydeşler körüşüvi

04 Aprel 2011

2011 senesi iyül 3 künü Qapsıhor köyüniñ yanında yerleşken qadimiy, ğayet dülber Ay-Serez köyüniñ sakinleri, olarnıñ evlâtları ve torunları körüştiler.
80-nci senelerniñ soñlarından itibaren keçirilgen ve endi ananeviy olğan bu körüşüvler üyken ve ösip keleyatqan nesil arasındaki bağnıñ üzülmegeni, aksine ep pekingeninden, ayserezliler nerede yaşağanlarından qatiy nazar tuvğan köylerini unutmağanlarından delâlet bermekte.

Bu sene körüşüvge Qırımdan ve Qırımnıñ tışından 400-den ziyade adam toplandı. Ay-Serez köy meclisi, qırımtatar halqı milliy areketi veteranlarınıñ körüşüvge etraflıca azırlanğanları, doğma ayserezlilerniñ maddiy yardımları sayesinde köydeşler körüşüvi şeñ ve unutılmaz teessuratlar qaldırğan güzel bir bayramğa çevirildi.

Öz köydeşlerinen körüşmek içün körüşüvge Qırımtatar halqı Meclisiniñ reisi Mustafa Cemilev de teşrif buyurdı. Öz çıqışında Mustafa Cemilev köydeşlerini birlikni saqlağanları, köyge sevgi ve ürmet ile yanaşqanları içün teşekkür bildirip, aynı zamanda köyniñ evelki qıyafeti ve şüretini ğayrıdan tiklemek boyunca areketlerni birleştirmekni teklif etti. Mustafa Cemilev köydeşleriniñ er bir körüşüvinde iştirak etmege, ana-babasınıñ bugüngece saqlanıp qalğan evini ziyaret etmege tırışa.

Ay-Serezlilerniñ ananeviy körüşüvine Amerika Qoşma Ştatlarında yaşağan milliy areket iştirakçisi doğma ayserezli Fikret Yurter de refiqası ile keldi. O, da köydeşlerini samimiy selâmladı ve köyni ğayrıdan tiklemek, tarihiy asabalığımıznı kelecek nesillerge qaldırmaq kerekligini qayd etti.

Köyniñ evelki qıyafetini ğayrıdan tiklemek, saqlamaq ve qorçalamaq meseleleri muzakeresi devamında Ay-Serez köyüniñ sakinleri Milliy Meclis reisinden köyde saqlanıp qalğan eski camini qaytarıp almaq ve qanuniyleştirmek boyunca vesiqalarnı resmiyleştirüvde ameliy yardım köstermesini rica ettiler. Vesiqalar azır olğanınen köylüler caminiñ tamirini başlamaq meramındalar. Mustafa Cemilev mezkür meseleniñ çeziminde köydeşlerine elinden kelgen yardımnı kösterecegini işandırdı.

Malümat içün:  NKVD malümatlarına köre 1944 senesi mayıs 18-de Ay-Serezden 1626 qırımtatarı sürgün etildi.