Qırımtatar halqı Meclisiniñ reisi Mustafa Cemilevniñ Avropa Akademiyasında çıqışı

01 Aprel 2011

2011 senesi iyün 28-de Qırımtatar halqı Meclisiniñ Almaniyada iş ziyaretinen bulunğanınıñ soñki künü alman paytahtınıñ ğarbiy tarafındaki memuriy rayonı Berlin-Grunevaldde yerleşken Avropa Akademiyasında Qırımtatar halqı Meclisiniñ reisi Mustafa Cemilevniñ NGO vekilleri, ekspertler ve tedqiqatçılarınen körüşüvi olıp keçti.

Körüşüvde Bütündünya qırımtatar kongressiniñ prezidenti, Meclis reisiniñ birinci muavini Refat Çubarov, Meclis tışqı alâqalar bölüginiñ başı Ali Hamzin, sabıq sovetler hududında zemaneviy milliy-siyasiy ceryanlarnı tadqiq etken professor Svetlana Çervonnaya, Meclis reisiniñ yardımcısı Lilâ Müslimova, bunıñ kibi de Şarqiy Avropağa yardım etüv cemiyetiniñ vekilleri, Bütündünya qırımtatar kongressi koordinatsion keñeşiniñ azası, Meclisniñ Almaniyada temsilcisi Ahmet Ozay, Ğarbiy Avropa qırımtatar medeniyet ve yardımlaşuv cemiyetiniñ reisi Rafet Karanlık, Köln şeer şurasınıñ deputatı Erhan Kara ve Şarqiy Avropağa yardım etüv cemiyetiniñ vekili İldar Harisov iştirak ettiler.

Körüşüvni alıp barğan ICATAT institutınıñ ilmiy koordinatorı Miste Hotopp-Rike Mustafa Cemilevni tedbirde bulunğanlarğa taqdim eterek, Meclis reisiniñ maruzasından evel qırımtatar halqınıñ öz aq-uquqları içün küreşi aqqında qısqadan ikâye etti. O, SSSR zamanında saflarında eñ çoq vekilleri olğan qırımtatar halqı milliy areketiniñ unikalligini, qırımtatarlar bugün de birlikli olğanlarını qayd etti. Qırımtatar halqı milliy areketiniñ demokratiya, insan ve halqlarnıñ uquqları içün küreşken diger milliy areketleri ile göñüldeşlik printsiplerine esaslanğanı – bu, belli dissident ve uquqqoruyıcı Mustafa Cemilevniñ hızmetidir.

Şu da qayd olundı ki, demokratiya printsiplerinde qurulğan qırımtatar milliy areketi zorluqsız, barışıq usulnen küreşüvniñ, eñ mürekkep meselelerni çezüvniñ nümünesidir.

Alman-qırımtatar dialogı künleriniñ programmasında közde tutulğanı kibi Mustafa Cemilev “Vatannı qan tökmeden qaytarıp aluv” mevzusında çıqış yaptı ve soñra körüşüv iştirakçileriniñ suallerine cevap berdi.

Muzakere devamında çıqışta bulunğan Reprssiyağa oğratılğan halqlarnı qorlav boyunca halqara birleşmeniñ prezidenti Tilman Tsülh uquqqoruv ve dissidentlik faaliyeti içün defalarca mahküm etilgen ve sovet kamplarında 17 yıl tutulğan Mustafa Cemilevge yüksek qıymet kesti. Tsülh özü temsil ettigi teşkilât tarafından keçirilgen qırımtatar halqınıñ küreşine qoltutuv aktsiyaları, bunıñ kibi de “POGROM” mecmuasında qırımtatar halqınıñ

Qırımğa qaytuv içün küreşi aqqında ikâye etken maqaleler hususında ayttı.

Professor Svetlana Çervonnaya körüşüv iştirakçilerine Avropa halqları federal kongressiniñ Nobel komitetine Barışıqlıq mukâfatına Mustafa Cemilevniñ namzetine qoltutmaq muracaatı aqqında haber etti.

Körüşüvniñ soñunda Berlinde yaşağan qırımtatar kemanecisi Temur Vahabov halq avalarını büyük ustalıqnen icra etip, er kesti hoşnut etti.

Körüşüvniñ resmiy qısmından soñ Mustafa Cemilev “Al-Cazira” teleradiokompaniyasınıñ suallerine cevap berdi.