Qırımtatar halqı Meclisi delegatsiyasınıñ Almaniyada Ukraina Elçiligine ziyareti

30 Mart 2011

2011 senesi iyün 27-de Qırımtatar halqı Meclisiniñ Milliy Meclis reisi, Ukraina halq deputatı Mustafa Cemilev reberligindeki delegatsiyası Almaniyağa yapqan iş ziyaretiniñ birinci künü Ukrainanıñ Almaniyadaki Elçiligini ziyaret etip, Ukrainanıñ Almaniyadaki Fevqulade ve Tolu vekâletli elçisi Natalya Zarudna ile körüşti.

Körüşüv devamında olğan subette elçilikniñ birinci kâtibi, doktor Vasiliy Himinets, Almaniya Federativ cumhuriyeti parlamentiniñ deputatları – alman-ukrain parlament gruppasınıñ vekilleri Helga Daub ve Mihael Groşek, Şarqiy Avropağa yardım berüv cemiyetiniñ vekilleri, Bütündünya qırımtatar kongressi koordinatsion keñeşiniñ azası, Meclisniñ Almaniyadaki temsilcisi Ahmet Ozay, Ğarbiy Avropa qırımtatarları medeniyet ve yardamlaşuv cemiyetiniñ reisi Rafet Qaranlıq, Köln şeer şurasınıñ deputatı Erhan Kara iştirak ettiler.

Ukrainanıñ Almaniyadaki Elçisi Natalya Zarudna musafirlerni qarşılarken, qayd etti ki, belli uquqqoruyıcı, Ukraina halq deputatı ve Meclis reisi Mustafa Cemilev ve yanındaki arqadaşlarınıñ ziyareti Almaniyada çalışqan ukrain diplomatlarına Qırım ve qırımtatar halqı problemleri aqqında keniş malümat almaq imkânını bere. Bu ise, öz nevbetinde Avropa Birligi devletlerinden biri olğan Almaniyağa Ukraina ve Avropa Birligi arasındaki işbirlik programması çerçivesinde çeşit leyhalarnıñ kerçekleştirilmesinde iştirak etmek içün yol açacaq.

Qırımtatar halqı Meclisiniñ reisi, Ukraina halq deputatı Mustafa Cemilev Qırımdaki siyasiy-içtimaiy vaziyetni qısqadan talil etip, Ukrainanıñ Almaniyadaki Elçisiniñ diqqatını Avropa Birligi, ÖBSE ve Avropa Şurası kibi halqara ve avropa teşkilâtlarına Ukrainağa yardım köstermesine celp etti. Böyle yardımğa nail olğan Ukraina ise qırımtatar halqınıñ uquqiy, iqtisadiy ve gumanitar meselelerniñ çezimini teminleye bilir. Çünki bu meseleler çezilmeden Qırımda Avropa Birligi tarafından amelge keçirileyatqan leyhalarnıñ semeresine ümüt etmek zor.

Mustafa Cemilev bunıñ kibi de qayd etti ki, qırımtatar halqı toplu sürette yurtqa qaytqanına 20 yıldan ziyade olğanına baqmadan Ukrainada qırımtatar halqınıñ uquqlarını tiklegen iç bir qanun qabul etilmedi. Neticede ukrainalı siyasetçilerniñ SSSR kommunist rejimi tarafından qırımtatar halqına nisbeten genotsidniñ aqibetlerini yoq etmege iqtidarına işançını ep coymaqta.

Bu munasebetnen Mustafa Cemilev böyle dedi: “Biz Qırımda qırımtatar halqınıñ uquqlarını ğayrıdan tiklev boyunca meselelerni muzakere etecek, onıñ Ukrainada telükesizligi ve inkişafını teminleycek halqara forumnıñ keçirilmesini ğayet müim, dep sayamız. Mezkür forumnı azırlamaq ve keçirmek qararını Qırımtatar halqınıñ Qurultayında qabul etip, tekliflerimizni Ukraina yolbaşçılarına yolladıq. Olarnıñ müsbet cevabını bekleymiz. Çünki qırımtatar halqınıñ aq-uquqlarını tiklev ve vatanına qaytuv em de yerleşmesine yardım kösterüv ceryanına halqara cemaatçılıqnı celp etüvni Ukrainağa SSSR qırımtatar halqına nisbeten yapqan cinayetlikniñ aqibetlerini yoq etüv boyunca kösterilgen yardım olaraq qabul etilmeli”

Ukrainanıñ Almaniyadaki Elçisi Natalya Zarudna Ukraina devleti qırımtatar halqınıñ avdeti ve tuvğan toprağında yerleşüv ceryanınıñ ketişatını teminlemek içün bütün areketlerni yapqanını qayd etti. “Tabiiy ki, bunıñnen bütün meseleler çezildi, demen olmaz, – dedi Elçi hanım. – Öz vatanına qaytqan adamlarnı topraqnen teminlev, milliy tasilini ğayrıdan tiklev meselelesine de ayrıca emiyet bermek zarur. Amma şunı da unutmamalı ki, bugünde-bugün Ukraina – sürgün etilgen halqlarnıñ qaytması ve yerleşmesine yardım bergen yekâne sovet cumhuriyetidir”.

“Biz qırımtatarlarnıñ öz aq-uquqları oğrunda küreşniñ qavğa-davasız usulını, milliy siyasette qullanılğan demokratik printsiplerni seçip alğanı içün oña teşekkürlerimiz soñsuzdır”, – dedi Natalya Zarudna ve kelecekte de ikmetli qırımtatar halqı Ukrainıñ eyiallılığına doğrultılğan bu yoldan ketmekni devam etecegine eminlik bildirdi.

Aynı zamanda Natalya hanım Zarudna subetdeşleriniñ diqqatını şuña da celp etti ki, Ukraina Prezidentiniñ Avropa Birligi devletlerinen emekdaşlıqqa taba yönelişi Ukrainanıñ iqtisadiy-içtimaiy inkişafına adım-adım yaqınlaşmaq imkânını bere. Ve bunıñ müsbet neticeleri mıtlaqa qırımtatar halqınıñ vaziyetinde de öz aksini tapar.

Ukrainanıñ Almaniyadaki Fevqulade ve Tolu vekâletli elçisi Natalya Zarudna Ukraina ve Almaniya arasındaki munasebetlerniñ yüksek seviyesi, alman iş dairelerniñ Ukrainada bugün amelge keçirileyatqan ve kelecekke planlaştırılğan eki taraflama kârlı leyhalarğa büyük diqqatını qayd etti. Körüşüvde Bündestag deputatlarınıñ iştirak etüvi bundan açıq delâlet bermekte. Elçi hanım Mustafa Cemilev ve Meclis delegatsiyasınıñ azalarına Almaniyada belgilegen işlerinde muvafaqiyet tiledi.