Menu 
Qırım musulmanlarınıñ müftiligi Büyük Cuma caminiñ eñ yahşı leyhası içün yarış ilân etti
23 Mart 2011
Belli olğanına köre 2011 senesi iyün 17 künü Qırım musulmanlarınıñ diniy idaresi büyük Cuma caminiñ qurucılığı içün Aqmescitte Yaltinskaya soqağı 22-deki topraq damartısından daimiy qullanmaq aqqını bergen devlet aktını aldı. Böyleliknen, Cuma cami qurucılığını başlamaq içün bütün zarur vesiqalarnıñ azır olması munasebetinen Qırım musulmanlarınıñ diniy idaresi bu esnada ekinci adımnı atmaq – caminiñ eñ yahşı leyhası içün yarışlaşuvnı resmiy sürette ilân etmek imkânına malik oldı
Bu aqta diniy idarede 2011 senesi iyün 22 künü ötkerilgen matbuat konferentsiyasında Qırım müftisiniñ muavini Ayder İsmailov haber etti.
“Yarış programması ve şartlarınıñ çerçivesinde Qırım musulmanlarınıñ diniy idaresi bir maqsadnı közde tuta: yarışlaşuv neticesinde Cuma cami kompleksiniñ şeer qurucılığı, bediiy ve milliy hususiyetleri esapqa alınğan bir leyhasını elde etmek”, – dey Ayder İsmailov.
Yarış vazifeleri ve mimarlarğa qoyulğan talaplar hususında diniy idareniñ vekili Cemil Bibişev ayttı: “Yarışnıñ baş vazifesi – Büyük Cuma cami obrazında mimarlıqta ananeviy qırımtatar ve musulman alâmetleri qullanılğanı alda eñ yahşı çizgilerni köstermektir. Yani caminiñ 4 minaresi, ezan çağırmaq içün ışığı olğan qulle, qubbeler ya da qubbe sisteması ve eñ müimi – 4 biñ adamnı sığdıra bilgen namaz odası olması şart”.
Namaz odası islâm mimarlığığınıñ qanunları boyunca ve aynı zamanda qırımtatar ananeleri de mevcut olğanı alda süslendirilmesi lâzim. Büyük Cuma cami kompleksiniñ erkânına Müftilikniñ memuriy binası da kirsetilmek kerek. Kompleksniñ etrafı abadanlaştırılğan olıp, arabalar içün mahsus duraq, raatlanmaq içün skemleler, şadırvan, eki qaravulhane de közde tutulması lâzim. Matbuat konferentsiyanıñ iştirakçileri şunı da qayd ettiler ki, yarış qapalı olıp, yarışçılarnıñ adları degil de tek nomerleri qayd etilecek. Yarışta iştirak etmek içün Ukraina ve başqa devletlerniñ mütehassısları, kollektivler, yarış sımarışçısına yarışta iştirak etmek istegi aqqında ariza yollağan adliyeciler ve ya da sımarışçı tarafından davet etilgen ve belgilengen müddette em de qoyulğan talaplarğa cevap bergen leyhalarını taqdim etken yuridik şahıslar davet etileler. Yarışta er angi yaştaki insanlar iştirak ete bileler.
Yarış 2011 senesi iyün 23-te başlana.
Yarışnıñ soñki müddeti – 2011 senesi avgust 23. .
Yarışta iştirak etken leyhalar 2011 senesi sentâbr 1-ge cemaat tarafından muzakere etilecek.
Yarış neticeleri 2011 senesi sentâbr 10 künü ilân etilecek.
Yarış ğaliplerini aşağıdaki mukâfat bekley:
I-nci yer – 8 000 grivnâ,
II –nci yer – 6000 grivnâ,
III –nci yer – 4000 grivnâ.
Yarış ğalipleriniñ leyha-smeta vesiqalarnıñ işlenmesinde ve komplekste müellifniñ ğayesi saqlanılmasını közetmek içün qurucılıq işleriniñ nezaretinde iştirak etmege aqqı bar. Yarışqa qatılmaq istegenler Qırım musulmanlarınıñ diniy idaresi adresine içinde teşkilâtnıñ adı ( ya da şahısnıñ adı, soyadı ve babasınıñ adı), adres, telefon, faks, elektron adresi olğan arizanı yollamaları şart. Ariza qayd olunğan soñ yarış iştirakçisine Büyük Cuma cami kompleksiniñ eskiz leyhasını işlevge tehnikiy vazife teklif etilecek. “Ümüt etemiz ki, Büyük Cuma caminiñ kompleksi Qırım paytahtınıñ ve umumen bütün Qırımnıñ yarışığı, yarımada sakinleri muabbetligi ve merhametliginiñ temsili olur”, – dedi A. İsmailov.
Büyük Cuma caminiñ qurucılığına şahsiy issesini qoşmaq ve Yüce Rabbimizniñ rizasını qazanmaq istegenler sermiyalarnı aşağıdaki esapqa yollay bileler:
Qırım musulmanlarınıñ diniy idaresi, Aqmescit ş.,Kurçatov soqağı, 4. OKPO 23450183, r/s 26009265071, MFO 380805 “Rayffayzen Bank Aval”. Kiyev ş. “Simferopol şeerinde Büyük cami qurucılığı içün”.
Alla eyi niyet ve hayırlı işler yapmaq istegenlerniñ episinden razı olsun.
