Mustafa Cemilev “Adaletlik nuru” mukâfatnıñ laureatı oldı

30 Mart 2011

“Adaletlik nuru” mukâfatnıñ laureatı Milliy Meclis reisi, Ukraina halq deputatı Mustafa Cemilev oldı.

“Mustafa Cemilev – zemaneviy vaqıtnıñ eñ belli siyasetçisidir, – jüri azalarnıñ biri, Ukraina katolik universitetniñ vitse-rektorı Miroslav Marinoviç saya. – O endi yıllarnen öz haqınıñ aq-uquqlarını zorbalıqsız şekilde qorçalamaq ıntıla. Onıñ dünya boyunca moral nufuzı yüksek olğanında şübe yoq”.

Böyle mukâfat özü kanadalı, amma ukrainalı peyda oluvı olğan Anastasiya Şkilnik teşebbüsinen moral, ahlâqiy ve maneviy liderlıq içün Ukrainada ekinci sefer taqdim etile.

“Böylece Anastasiya Şkilnik öz babası yani Ukrainada azat etüv devriniñ belli cemaat ve siyasiy erbabı, yurist, doktor Mihail Şkilnikniñ hatırasını saya”, – belgiledi Miroslav Marinoviç.

Anastasiya Şkilnikniñ aytqanına köre,bu mukâfat ile adam göñlünde yarıq yaqa ve daa insaneviyce cemaat yoluna yol köstere bilgen adamlar taqdim oluna. “Menim babam aqiqat içün küreşinde iç bir vaqıt iç bir şey beklemey edi. O moral liderliginiñ aydın bir misali edi. Aynı şunı içün mende böyle mukâfatnı tesis etmek kibi ğaye peyda oldı”, dedi o.

Bu etapta areket etken jüriler Ukrainanıñ cemaat-siyasiy ömürindeki avangardda bulunğan erbapnı sayladı. Bundan ğayrı bu adam alçaq goñlli, öz menfaatı köz etmegen ve moral printsiplerge sadıq olmalı edi. Aynı böyle çizgiler jüri azalarınıñ fikirince ukrain siyasetçisi, milliy areket lideri Mustafa Cemilevde bardır.

Keçken yıl noyabr ayında “Adaletlik nuru” mukâfatnıñ laureatı ukrain edebiyatçı, dissident, aq-uquqlar qorçalaycısı ve publitsist Yevgeniy Sverstük oldı. Mukâfatnı oña Kiyev şeeriniñ oca evinde Ukraina katolik universitetiniñ rektorı, doktor Böris Gudzâk taqdim etti.

Spravka içün:

“Adaletlik nuru” mukâfatı 2010 senesi özü kanadalı, amma ukrainalı peyda oluvı olğan Anastasiya Şkilnik teşebbüsinen babası Ukrainada azat etüv devriniñ belli cemaat ve siyasiy erbabı, yurist, doktor Mihail Şkilnikniñ hatırasını saymaq maqsadınen peyda etildi.

Malümat   http://ucu.edu.ua/  saytından alındı