Milliy Meclis toplaşuvı

29 Mart 2011

Aprel 29 künü Milliy Meclisniñ nevbetteki toplaşuvı olıp keçti. Mında regional meclislerniñ reisleri ve “Kurultay – Ruh” fraktsiyasınıñ deputatları davet etildi.

Toplaşuvda qırımtatar halqını sürgün etilgenine 67 yıl tolğanı munasebetinen Memorial tedbirlerge azırlanuv ve keçirüv boyunca leyhasınıñ soñki variantı tayin etildi. Bundan ğayrı Bütünqırım matem mitinginiñ iştirakçileriniñ kolonnaları nasıl areket marşrutı belgilendi.

Nevbetteki sual Yedi Quyu ve Canköy rayonlarındaki yerli meclis azalarınıñ saylavlar neticelerinen bağlı edi. Yerli Meclisler saylavlarına azırlanuv ve teşkil etüv komissiyasınıñ kâtibi Zair Smedlâyevniñ malümatını diñlegen soñ Milliy Meclis bu yıl mayıs 8 künü Canköy rayonında yaşağan qırımtatarlarnıñ regional konferentsiyasnı ötkermek kibi qarar çıqardılar.

Bundan ğayrı Milliy Meclis toplaşuvında “İrade” cemaat teşkilâtınıñ “Qırımtatar halqınıñ milliy canlanuv künü” kibi künni tayin etmek teklifi baqıldı. “İrade” cemaat teşkilâtınıñ reisi, Bütündünya qırımtatarlar kongressiniñ delegatı Yakub İpçi ne içün bu kün kerek olğanı, onıñ tayin etilmesi qırımtatar halqına nasıl müim olğanını toplaşqanlarğa añlattı.

Bu sualni muzakere etken vaqıt Milliy Meclis reisi Mustafa Cemilev 5-nci Qurultaynıñ soñki sessiyalarında iyün 26 künü – Qırımtatar milliy bayraq künü dep qabul etilgenini ve bu qarar Bütündünya qırımtatarlar kongressi tarafından taqdirlengenini hatırlattı.

Subbetler neticesinde “İrade” cemaat teşkilâtınıñ “Qırımtatar halqınıñ milliy canlanuv künü” kibi künni tayin etmek teklifini daa tafsilâtlıca yani qırımtatar cemaatınıñ keñ iştiragi ve “Qırım” gazetasınıñ muarririyetinde bir sıra tögerek masalarnıñ keçirilmesi devamında muzakere etmek kibi qararğa keldiler.

Milliy Meclis azaları topraq meselesi boyunca vaqianı yani Milliy Meclis ve QMCniñ icra akimiyeti arasında topraq meselesi boyunca peyda olğan dialognı yani mesele çezilip başlanğanını ayırı şahslar öz tarafından provakatsion vaqialar ile keder etmek tırışqanları aqqında alnı da muzakere ettiler.
Milliy Meclisniñ matbuat merkezi