“Marakand”da Meclisniñ resmiy saytını taqdim ettiler

28 Mart 2011

2011 senesi 28 aprel künü “Marakand” kompleksiniñ konferents-zalında Qırımtatar Milliy Meclisniñ resmiy saytınıñ taqdimnamesi keçirildi.

Tedbirde Qırımtatar Milliy Meclisniñ Reisi, Ukraina halq deputatı Mustafa Cemilev, onıñ birinci muavini Refat Çubarov, Meclisniñ idare ve hızmetleriniñ yolbaşçıları, QMC’de Ukraina Prezidentiniñ Daimiy Temsilcisiniñ muavini İbraim Mamutov, QMC Cumhuriyet informatsiya komitetiniñ Reis muavini Şevket Memetov ve QMC Cumhuriyet informatsiya komiteti Reisiniñ muavini Aleksandr Çirkov, QMC YŞ Kâtipliginiñ informatsion-analitik idaresiniñ reberi Olga Sulnikova, QMC’de “Halqara cumhuriyet institutı” (IRI) programmasınıñ koordinatorı Konstantin Ploskiy, Qırımda BMT PRİK PR’nıñ yerli iqtidasiy inkişaf boyunca mutehassıs Emil Halitov, KİV temsilcileri, Qurultay delegatları ve cemaatçılıq iştirak ettiler.

Taqdimname ketişatında qayd etildi ki, Meclisniñ resmiy saytnıñ faaliyeti Meclisniñ er künlük işini, Qurultaynıñ sessiyalarını, qırımtatarlarnıñ yerleşüvi, aq-uquqları, tüklenüvi, Ukrainanıñ içtimaiy-siyasiy ve iqtisadiy ayatına integratsiyasınen bağlı müim vaqialarnı aks etmek içün hızmet etecek. Saytnıñ strukturasına “Qurultay”, “Meclis”, “Diaspora”, “Multimedia” bölükleri kire, em de farqlı sualler boyunca Meclisniñ idareleri ve hızmetlerine muracaat etmek imkânı olacaq. Ondan ğayrı, saytnıñ yapılmasında ayrıca “Unutma”, “Halqara forum”, “İçtimaiy teşebbüsler”, “Qırımtatar milliy areketi” kibi bloklarğa diqqat ayırılacaq.

Qırımtatarca (latin grafikasında), ukraince, inglizce ve rusça qullanılğanı içün, saytnıñ qullanıcıları arasında ukrain ve dünya KİV, Ukraina devlet akimiyeti qurumlarınıñ temsilcileri, halqara teşkilâtlar, siyasiy ve içtimaiy teşkilâtlar, siyasetçiler, ekspertler, studentlerniñ olması beklenile. Meclisniñ yolbaşçılığınıñ fikrine köre, latin grafikasında qırımtatar tili türk dünyası içün da saytnıñ “qapularını” açar. Saytnıñ faal qullanıcılar sırasına başqa ülkelerde yaşağan qırımtatarlar da kirecekler.

Qırımtatar Milliy Meclisniñ adından Meclisniñ Matbuat hızmeti saytnıñ açılmasında büyük yardım köstergen Ukrainada “Halqara cumhuriyet institutı”na, (AQŞ) regional yolbaşçısı Gans Hristofor Holzenniñ şahsında, ve “Qırım inkişafı vaqfı” Hayriye teşkilâtına, Prezidenti Rustem Umerovnıñ şahsında, teşekkür sözlerini bildirdi.