Büyük Cuma Cami, mektep qurucılığı, Hansaraynı YÜNESKO cedveline kirsetüv aqqındaki meseleler Türkiyeniñ Ukrainadaki elçisi Qırımğa ziyaret yapqan vaqtında köterildi

18 Mart 2011

Aprel 18 künü Qırım Yuqarı Şurasınıñ reisi Vasiliy Cartı Qırımğa işçi ziyaretnen kelgen Türkiyeniñ Ukrainadaki Büyük elçisi Ahmet Bülent Meriçni qabul etti.

Körüşüvde Milliy Meclis reisi Mustafa Cemilev de iştirak etti.

Qırım ve Türkiye arasında çeşit saalarda işbirlik, Qırımnıñ investitsiya imkânları, ticaret munasebetlerini kenişletüv ve yañı transport yollarını açmaq, degen meseleler muzakere etildi.

V.Cartı qırımtatarlarnıñ içtimaiy problemlerini çezüvde ameliy yardım köstergeni içün Türkiye ükümetine teşekkür bildirdi.

A.B.Meriç de V.Cartığa bildirgenine köre, Türkiye Qırımnı istiqbali olğan, investitsiyalar içün kelişken region olaraq saya.

“Bu sene küzde Aqmescitte “İnotekEkspoKrım” adlı sergini közde tutamız.

Qırım ve Ukraina iqtisadiyatçıları Türkiye iş adamlarına muhtariyetniñ iqtisadiy imkânlarını ve investitsiya leyhalarını taqdim ete bilirler”, – dep qayd etti Meriç.

Bunıñnen beraber elçi işandırğanına köre, Türkiye, öz tarihiy vatanına qaytayatqan qırımtatar halqınıñ yerleşüvinde Ukrainağa qoltutmağa devam etecek.

Meclis reisi bir sıra gumanitar leyhanı yerine ketirmek içün teşkiliy meselelerni tezden çezmek müim, dep qayd etti. Bu meseleler arasında Aqmescitte Qırımtatar medeniyet merkezi binasınıñ qurucılığı ve Fontanı mikrorayonında orta tasil mektebiniñ qurucılığını bitirmek.

“Men içün Qırımda adamlar stabil yaşayışnı körmesi müim yerni tuta. Ve men yañı akimiyet yardımınen bütün problemlerni çezmege tırışarım”, – qayd etti Vasiliy Cartı.

Türkiye elçisi V.Cartığa minnetdarlıq bildirip, bu saada Qırım Vezirler şurasına qoltutacağını ayttı. “TİKA Bağçasarayda yañı mektep qurmağa ve Aqmescitte bir mektepniñ qurucılığını bitirmek içün yardım etmege azır. Ondan ğayrı agentlik Büyük Cuma Caminiñ qurucılığına qoltutmağa ve Bağçasaraynıñ Hansarayı YÜNESKO dünya mirası cedveline kirsetilmesine yardım etmege azır”, – dep bildirdi A.Meriç.

Şu künü Mustafa Cemilev ve Qırım Nazirler Şurasınıñ reisi arasında ayrı körüşüv olıp keçti. halqımıznıñ yerleşüv meseleleri muzakere olundı.