Milliy Meclisniñ mart 21 künü olıp keçken toplaşuvı

21 Sentâbr 2011

Mart 21 künü Milliy Meclisniñ nevbetteki toplaşuvı olıp keçti. Toplaşuvnıñ kün tertibine qırımtatar halqınıñ Qırımdan sürgün etilgeniniñ 67 yıllığınen bağlı hatıra tedbirleriniñ azırlanıluvı ve ötkerilmesi, anna tilimizniñ tiklenüvi, Aluşta ve Sudaq regionlarındaki yerli ve regional meclislerniñ faaliyetine dair meseleler kirsetildi.

Milliy Meclisniñ toplaşuvında qırımtatar halqı Qurultayı Teftiş komissiyasınıñ azaları, “Qurultay-Ruh” fraktsiyasınıñ azaları, matbuat vastalarınıñ vekilleri iştirak ettiler.

Qırımtatar halqınıñ Qırımdan sürgün etilgeniniñ 67 yıllığınen bağlı hatıra tedbirlerini azırlamaq ve ötkermek maqsadınen Milliy Meclis reisi Mustafa Cemilevniñ reisliginde Teşkiliy komitet meydanğa ketirildi ve onıñ erkânı tasdiqlandı.

Teşkiliy komitetke aprel 1-ge qadar tedbirlerniñ cedvelini tizip, Mecliske taqdim etmek avale etildi. Şu munasebet ile, Teşkiliy komitet qırımtatar cemaat ve siyasiy teşkilâtlarnen bağlanıp, olarnıñ tefsiyelerini köz ögüne alması şart.

Milliy Meclisniñ toplaşuvında evel qabul olunğan umummilliy “Ana tili oğrunda küreş!” programmasını amelge keçirüv yolları muzakere etildi ve bu işnen oğraşacaq Komissiyanıñ erkânı tasdiqlandı. Mezkür komissiyanıñ reisi olaraq Milliy Meclis reisiniñ muavini R.İlyasov tayinlendi.
“Suvdağ regionında yaşağan qırımtatarlarnıñ regional konferentsiyası” meselesi boyunca yerli meclisler saylavlarını azırlav ve ötkerüv Komissiyasınıñ kâtibi Z.Smedlâyev çıqışta bulundı.

Yerli meclis saylavlarınıñ neticelerini ögrengen Meclis azaları aprel 9 künü Suvdağ regionında konferentsiya keçirip, regional meclisni ve onıñ reisini tasdiqlamaq qararını qabul ettiler.

2010 senesi oktâbr 31 künü ötkerilgen saylavda bazı yerli meclisler ve olarnıñ reisleriniñ faaliyetlerini muzakere etüv meselesi toplaşuvda qızğın munaqaşalar doğurdı.

Meclis azaları ve davet etilgen adamlarnıñ, bunıñle beraber Aluşta şeer ve Aluşta regional meclis azalarınıñ çoqtan-çoq çıqışlarından soñ, Körbekül ve Büyük Lampat köy meclisleriniñ ve Aluşta şeer meclisiniñ faaliyetini müddetten evel toqtatmaq qararı qabul etildi.

Bunıñle beraber, Milliy Meclis yerli meclislerge saylavlarnı azırlav ve keçirüv boyunca Komissiyağa Körbekül ve Büyük Lampat köy meclisleri em de Aluşta şeer meclisine saylavlarnı azırlav ve ötkerüv boyunca yerli territorial komissiyanı tizmege kirişmek avale etildi.

Meclis Prezidiumına nevbetteki toplşuvğa Qurultayda qabul olunğan qararlarğa qarşı çıqqan Aluşta regionınıñ ayrı yerli meclis azalarınıñ statusı meselesini kün tertibine çıqarmaq avale etildi.