İ.Gasprinskiy doğğanına 160 tolğanı munasebetinen tedbirler başlandı

18 Sentâbr 2011

Mart 18 künü Qırımda ulu qırımtatar maarifçisi, yazıcı, pedagog, terciman ve cemaat erbabı İ.Gasprinskiyniñ doğğanına 160 yıl tolğanı munasebetinen bir sıra tedbirler başlanmaqta.

Tedbirlerni Milliy Meclis, Milletlerara munasebetler ve sürgün olunğan grajdanlarnıñ işleri boyunca cumhuriyet komiteti, “Maarifçi” birleşmesi teşkil etti.

Sabahtan Aqmescitte yerleşken ulu maarifçiniñ abidesi yanına gül-çeçekler qoyuldı. Mında qırımtatar ve ukrain cemaatı, şeer akimiyeti, Milliy Meclis azaları, medeniyet erbapları, Aliy oquv yurtlarnıñ ocaları ve studentler toplandı.

Belli maarifniñ hatırasını Milliy Meclis reisiniñ birinci muavini, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, QMC Nazirler Şurası reisiniñ muavini Aziz Abdullayev, Milletlerara munasebetler ve sürgün olunğan grajdanlarnıñ işleri boyunca cumhuriyet komitetiniñ reisi Edem Dudakov, “Maarifçi” birleşmesiniñ reisi, Qırım Yuqarı Şurasınıñ deputatı Safure Kacametova, Bütünukrain informatsion-medeniy merkeziniñ yolbaşçısı Vladislav Yermakov, QMPUniñ qırımtatar ve türk edebiyatı kafedrasınıñ müdiri İsmail Kerimov ve digerleri sıcaq sözler ile añdılar.

Refat Çubarov öz çıqışında Milliy Meclis adından bu merasimni teşkil etken ve umumen toplanğan adamlarğa minnetdarlıq bildirdi. “Biz ecdatlarımıznıñ yolunen ketmek içün olar nenen oğraşqanlarını yahşı bilmek kerekmiz. Ve nasıl qıyın olmasa da, nasıl problemler ögümizge çıqmasa da, biz ögge keterek, öz bilgilerimizni mükemmelleştirmek içün İsmail Gasprinskiy kibi adamlarnıñ yapqan işlerinden faydalanmak kerekmiz”, – dedi Çubarov.

Bundan soñ İ.Gasprinskiy adına qırımtatar kitaphanesinde “İ.Gasprinskiyniñ mirası” adında kitap-vesiqalı serginiñ açılışı oldı. Mında da Milliy Meclis reisiniñ birinci muavini, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Milletlerara munasebetler ve sürgün olunğan grajdanlarnıñ işleri boyunca cumhuriyet komitetiniñ reisi Edem Dudakov, “Marifçi” birleşmesiniñ reisi, Qırım Yuqarı Şurasınıñ deputatı Safure Kacametova, Ukraina yazıcılar birleşmesiniñ azası, Qırımtatar yazıcılar birliginiñ reisi Riza Fazıl ve digerleri iştirak ettiler.

Şunı hatırlamaq kerek ki, İ.Gasprinskiy doğğanına 160 yıl tolğanı munasebetinen Qırımda böyle tedbirler olıp keçecek:

Mart 21 künü Bağçasarayda yerleşken İ.Gasprinskiyniñ büsti olğan yerge gül-çeçeklerniñ tantanalı qoyulıvı olacaq. Bundan soñ onıñ ömür ve faaliyeti ile bağlı yerler ziyaret etilecek.

Mart 23 künü İ.Gasprinskiy doğğanına 160 yıl tolğanı munasebetinen tantanalı aqşam ve Qırım akademik-muzıkalı-drama teatrinde medeniyet ustalarınıñ kontsertiniñ ötkerilmesi planlaştırıla.

Mart 24 künü Qırımtatar sanat müzeyinde “İ.Gasprinskiy ve Qırım” adlı mültimediy şekilde taqdimi olacaq.

Mart 24 künü İ.Gasprinskiy adına qırımtatar kitaphanesinde İ.Gasprinskiy “Rus musulmanlığı: musulmanlarnıñ fikirleri, ufaq maqleler ve közetüvleri” kitabınıñ yazğanına 130 yıl olacağına bağışlanğan kitaplar sergisi olacaq.

Mart 24 künü İ.Gasprinskiy adına qırımtatar kitaphanesinde “İ.Gaprinskiyniñ dünyası” adlı edebiy oquvları olacaq.

Mart-aprel aylarında “Alem-i nisvan” ve “Alem-i subyan” mektep gazetalarınıñ konkursı keçirilmege planlaştırıla.

Mart-aprel ayları yazıclır, alimler ve pedagoglar iştiragınen qırımtatar telekanallarında “İ. Gasprinskiy ile XXI asırğa” adlı bir sıra teleyayınlar yapılacaq.

Oktâbr ayında QMPUnde İ.GŞasprinskiyniñ ömüri ve faaliyetine bağışlanğan Halqara ilmiy-ameliy konferentsiyalar ötkerilecek.