ÖBSE hadimleri Milliy Meclis ofisinde bulundılar

01 Aprel 2011

Mart 1 künü Milliy Medlisniñ reisiniñ birinci muavini Refat Çubarov ÖBSE Aliy Komissarınıñ milliy azlıqlarnıñ işleri boyunca mesleatçısı Klemens Büşer ve adliye meseleleri boyunca mesleatçısı Vinsent de Grafnı qabul etti.

Körüşüv devamında Milliy Meclisniñ bir sıra meselelerge nisbeten noqtaiy-nazarı aydınlatıldı. Cümleden, ÖBSE vekilleriniñ diqqatı Qırımda topraq meselesi meselesinde muayyen yılışuvlar közetilip başlanğanına em de Meclis yolbaşçılığınıñ dialogı müsbet bir yolğa çıqayatqanına celp etildi.

Bundan ğayrı, sürgünlikke oğratılğanlarnıñ aq-uquqları ve statusını muvafıqlaştıra bilecek Ukraina Qanunınıñ mıtlaqa qabul etilmek kerekligi aqqındaki mesele de muzakere mevzularından biri oldı.

R.Çubarov ÖBSE vekilleriniñ ricasına binaen qırımtatar halqınıñ aq-uquqlarını ğayrıdan tiklev, onıñ havfsızlığını teminlev ve Ukrainada inkişaf etmesine kefalet berüv meseleleri boyunca halqara forumğa azırlıqnıñ ketişatı aqqında ikâye etti.

– Halqara cemaatçılıq, şu cümleden, ÖBSE teşkilâtı Ukrainadaki ve Qırımdaki vaziyetnen ne qadar çoqça meraqlansalar, devletniñ qırımtatar halqına munasebeti de şu qadar müsbet tarafqa deñişir, – dep qayd etti R.Çubarov musafirlerge muracaat eter eken.
Körüşüvde Milliy Meclis prezidiumınıñ azaları Ali Hamzin, Zair Smedlâyev ve Bekir Mamutov da iştirak ettiler.