M.Cemilev Herson regional meclisiniñ yolbaşçılığını qabul etti

16 Mart 2011

Keçken afta Milliy Meclis ofisinde Ukraina halq deputatı, Milliy Meclis reisi Mustafa Cemilev Herson regional meclisiniñ vekillerinen körüşti. Bular aqqında QHAğa Herson regional meclisiniñ reisi Asan Aliyev aytıp berdi.

A.Aliyev bildirgeni kibi, körüşüvde Milliy Meclis reisiniñ birinci muavini, Bütündünya qırımtatrlar kongressiniñ prezidenti, deputat Refat Çubarov, Qırım musulmanlar müftisi hacı Emirali Ablayev ve Herson ve Geniçesk rayonındaki regional meclisiniñ azaları iştirak etti.

Belli olğanı kibi, körüşüv devamında Herson rayonında yaşağan qırımtatarlarnen bağlı bir sıra aktual sualler baqıldı. Olardan biri ana tiliniñ ağır vaziyeti, şu cümleden, milliy mekteplerniñ açılması ve qırımtatar tilinde tasil aluv meseleleridir.

Herson regional meclisiniñ vekilleri andaki qırımtatarlarnıñ içtimaiy-iqtisadiy alı aqqında, regional mecliske saylavlar nevbeti boyunca sualler baqıldı. Büyük diqqat topraq meselesine celp etildi. “Herson vilâtinde yaşağan qırımtataralar içün topraq mevzusı pek aktualdir, çünki çoqusı qırımtatarlar mesken ev qurmaq içün Qırımda uçastka alıp Vatanına köçmek isteyler”, – dedi A.Aliyev

Bundan ğayrı, körüşüv devamında radikal diniy ceryanlarnıñ peyda olması qırımtatarlar arasında Qırım Müftiyatına qarşı agitatsiyalarnı qaviyleştireler.

Herson regional meclisi bar olğan malümatqa köre bugünde-bugün vilâyette 9 biñge yaqın qırımtatar yaşay, olardan 7 biñ Geniçesk rayonında yerleşken.

QHA bergen malümat boyunca