Bağçasarayda Gdansk şeerinden poloniya delegatsiyasınıñ Zaporojye Nizov Ordusınen körüşüvi olıp keçti

13 Mart 2011

Fevral 13 künü Bağçasarayda “Etno-DİALOG” medeniyet leyhası çerçivesinde Qırımda bulunğan Gdansk şeerinden poloniya delegatsiyası Zaporojye Nizov Ordusınıñ vekilleri Vitaliy Mandık ve Sergey Şkurko ile körüştiler.

Körüşüvde Milliy Meclisniñ Tışqı alâqalar boyunca idareniñ başı Ali Hamzin ve Gdansk universitetiniñ aspirantı, Poloniya qırımtatar diasporasınıñ vekili Nedim Üseinov da iştirak ettiler.

Poloniya delegatsiyasını körüşüvde Gdansk felsefe, içtimaiyat ve jurnalistika institutınıñ müdiri, professor Tsezarı Obraht-Prondzınskiy, Gdanskteki aziz Maksimiliana Kölbe adına birleşme ve körüşüv Evniñ müdiri Roman Zöla ve şu Evniñ programma işler boyunca vitse-müdiri Arkadiuş Gölinskiy, Gdanskteki ocalar tasil aluv Merkeziniñ eksperti Renata Mistaj, Veyherovo şeeriniñ Rayon tasil-terbiye kompleksiniñ müdiri Ancey Bıçkovskiy, Reda şeeriniñ Medeniyet, sport ve rekreatsiya Şeer merkeziniñ müdiri Yeji Konradi.

Eki taraf poloniya, ukrain ve qırımtatar halqlarınıñ tarihi ile bağlı keniş sıra suallerni muzakere ettiler. Şu cümleden Qırım hanlığı, Zaporojye Seçi ve Reç Pospalitaya arasında olğan tarihiy bağ aqqında fikirleştiler.

Faal dostane subet devamında Çernomorsk baseynniñ baş regional oyuncısı olğan Qırım, Ukraina ve Poloniya arasında XVI ve XVII asırlarda keçken cenklerde olar nasıl birleşmelerde bulunmasa da, üçevi de mağlübiyetke oğradılar. Ve neticede XVIII ve HH asırnıñ soñunda poloniya, ukrain, qırımtatar halqları öz tarihinde facialı devirlerni başından keçirerek, öz devleçilik ve mustaqilligini coydılar, açlıq, icret, sürgünlik, million adamlarnıñ ölüvi ve genotsidni çektiler.

Körüşüvniñ soñunda iştirakçiler Ukraina, Poloniya, Qırım arasında dostane bağnı qaviyleştirmek maqsadınen öz halqları arasında cemaat teşebbüsini inkişaf etmege biri-birini çağırdılar.

Körüşüv Hansaray oyunca ziyaretnen yekünlendi.