Mustafa Cemilev Joze Manuel Pintu Tayşernen körüşti

09 Mart 2011

Fevral 9 künü Ukraina halq deputatı, Milliy Meclisniñ reisi Mustafa Cemilev Ukrainada Avropa Birligi Temsilcisiniñ Başı, elçi Joze Manuel Pintu Tayşernen körüşti.

Körüşüvde Temsilcilikniñ yerli ve regional inkişaf leyhaları boyunca yolbaşçısı Entso Damiani, Milliy Meclis reisiniñ birinci muavini, Bütündünya qırımtatarlar Kongressiniñ prezidenti Refat Çubarov, Milliy Mecliste Tışqı alâqalar bölüginiñ yolbaşçısı Ali Hamzin, Milliy Meclis Kâtibatınıñ yolbaşçısı Zair Smedlâyev iştirak ettiler.

Aqmescitte Qırımnıñ Regional inkişafı agentligi açılğanı munasebetinen Qırımnı ziyaret etken Joze Manuel Pintu Teyşer bu agentlik Qırımda bir çoq sotsial meselelerniñ çezilüvine öz issesini qoşacağına eminlik bildirerek, Qırımda tadbiq olunacaq leyha ve programmalarğa qırımtatarlarnıñ faal celp etilmesiniñ müimligini de qayd etti.

Mustafa Cemilev nufuzlı musafirge qırımtatar halqınıñ problemlerine daima diqqat ayırğanı içün minnetdarlıq bildirerek, Milliy Meclis ve Qırım akimiyeti arasındaki alâqalar, birinci nevbette, qırımtatarlarğa topraq uçastkalarını ayıruv meselesi üzerinde tafsilâtlı toqtaldı.

“Bugünki problemlerni, eñ evelâ, topraqnen bağlı meselelerni QMC Nazirler şurasınıñ reisi Vasiliy Cartınen birlikte çezmek içün yapılğan adımlarımız müsbet neticeler berir, adamlarnıñ akimiyetke işançı tiklenir, dep ümüt etem. Biz akimiyetnen daimiy alâqa tutmağa, şu cümleden, bazı pıtraqlı meselelerniñ er kes içün uyğun olğan formata çezilmesi içün dialogğa azırmız”, – dedi M.Cemilev. aynı vaqıtta, Milliy Meclisniñ reisi Aqmescitte açılğan yañı agentlik qırımtatarlarnıñ yerleşüvi, mektep ve mesken-evlerniñ qurulışı içün halqara yardımnı celp etmege yardımlaşır, dep ümüt bildirdi.

Körüşüvde Büyük cami içün topraq ayıruv boyunca vaziyet, Bağçasaraydaki Hansarayğa YÜNESKOnıñ Bütüncian mirasları cedveline kirsetmek maqsadınen umummilliy statusnı bermek meselesi de baqıldı. Joze Manuel Pintu Teyşer Qırımnıñ medeniy abidelerini tedqiqat etüv boyunca mahsus leyha yaqın vaqıtta ömürge keçirelecegini bildirdi.

Körüşüvde qırımtatar halqınıñ aq-uquqlarını ğayrıdan tiklev meselesine bağışlanacaq Halqara forumnıñ ötkerilüvinen bağlı meseleler de muzakere etildi.