Vladimir Yatsuba Mustafa Cemilev ile körüşti

04 Mart 2011

Fevral 4 künü Ukraina Prezidentiniñ Qırımdaki Daimiy temsilcisi Vladimir Yatsuba Ukraina halq deputatı, Milliy Meclis reisi Mustafa Cemilev ile körüşti.

Bu körüşüvde Ukraina Prezidentiniñ Qırımdaki Daimiy temsilcisiniñ muavini İbraim Mamutov da iştirak etti.

Eki saat devam etken subette muhtariyetniñ içtimaiy-iqtisadiy inkişafı, Ukraina Prezidenti Viktor Yanukoviçniñ qırımtatar halqı ve başqa milletlerniñ yerleştirüvinen bağlı Qarar ve avalelerniñ eda etilmesi aqqında laf yürsetildi.

Vladimir Yatsubanıñ fikirine köre, muhtariyet ükümeti Vasiliy Cartınıñ reberliginde Qırımnıñ içtimaiy-iqtisadiy inkişafı programmasınıñ çerçivesinde sürgün etilgen halqlarnıñ yerleştirüvi boyunca suallerge büyük diqqat ayırıldı. Ukraina Prezidentiniñ Qırımdaki Daimiy temsilcisi bildirgeni kibi, soñki vaqıt bu saada toplanğan problemlerniñ çezilüvi boyunca bir dialog ve kompromissler tapılğanı bir müsbiy faktordır.

Miliy Meclis reisi Mustafa Cemilev öz nevbetinde V. Yatsubanı fevral 3 künü qırım ükümetiniñ başı ile olğan körüşüvniñ neticesi ve añlaşuvlarınen tanıştırdı. Bundan ğayrı, cumhuriyet ve devlet tarafından baqılacaq bir sıra qanuniy, içtimaiy, diniy saada bar olğan problemler aqqında ikâye etti.

Körüşüv bitkeninen eki taraf böyle dialog daa devam etilmesi aqqında istegini bildirdiler.