Milliy Meclis reisi Mustafa Cemilev ve QMC Nazirler Şurasınıñ reisi Vasiliy Cartınıñ körüşüvi

03 Mart 2011

Fevral 3 künü Ukraina halq deputatı, Milliy Meclis reisi Mustafa Cemilev ve QMC Nazirler Şurasınıñ reisi Vasiliy Cartınıñ körüşüvi olıp keçti.

Körüşüvde QMC Yuqarı Şurasınıñ deputatı, Milliy Meclis reisiniñ muavini Refat Çubarov, QMC Nazirler Şurası reisiniñ muavini Azizi Abdullayev, Bağçasaray rayon devlet memuriyetiniñ başı İlmi Ümerov da iştirak ettiler.

Dialog ketişatında iştirakçiler qırımtatar halqınıñ yerleşüvinen bağlı, Aqmescit şeeri ve Aqmescit rayonında mesken evler qurulması içün topraqnı ruhsetsiz alğan sürgün etilgen ve başqa grajdanlar şu yerlerni boşatmasınen bağlı problemlerniñ çezilmesi boyunca Komissiyanıñ çalışuvı başlanması aqqında bir sıra aktual sualler muzakere ettiler.

Ukraina halq deputatı, Milliy Meclis reisi Mustafa Cemilev ve QMC Nazirler Şurasınıñ reisi Vasiliy Cartı toplanğan problemlerni açıq şekilde baqmaq ve Qırım ve onıñ milletleri içün hayırlıqnen çezilmesi aqqında öz isteklerini bildirdiler.

Bunen beraber Mustafa Cemilev ve Vasiliy Cartı topraq, tasil, iqtisadiy ve diger saada adamlarğa öz uquqlarını realizatsiya yapmağa imkân bergen real şartlarnı meydanğa ketirmek içün Qırımnıñ körümli siyasetçilerini ve akimiyet vekilleriniñ küçlerini birleştirmek keregini qayd etti.

Körüşüv bitkeninde Milliy Meclis reisi Mustafa Cemilev ve QMC Nazirler Şurasınıñ reisi Vasiliy Cartı bütün baqılğan suallerde özara añlaşılması ve umumen körüşüvden memnün qalğanlarını bildirdiler.