Milliy meclis reisiniñ Türkiye Baş nazirinen körüşüvi

24 Dekabr 2011

Türkiyeniñ Baş naziri Recep Tayip ErdoğanUkraina paytahtıKiyevge eki künlükresmiy ziyaret programması çerçivesinde Milliy Meclisniñ reisi Mustafa Cemilevnen körüşti.

Bir buçuq saat devam etken körüşüvde bunıñ kibi de Türkiyeniñ Ukrainadaki elçisi Ahmet Bülent, TİKA prezidenti Musa Qulaqlıqaya ve Mustafa Cemilevniñ yardımcısı Asan Ümerov iştirak ettiler.

Türkiye Baş naziriniñ ricası boyunca M.Cemilev Qırımdaki içtimaiy-siyasiy vaziyetni, qırımtatar halqınıñ eñ müim meselelerini tafsilâtlı añlattı. O, bu meselelerni çezüvde Ukrainanıñ iştiraki aqqında aytırken, ağımdaki senede bu maqsadlarğa devlet bücetinden olğanı-olacağı 23 million grivnâ ayırılğanını, bu ise sürgün etilgenlerni yerleştirüv programmasınıñ qapalmasını köstergenini qayd etti.

Körüşüv devamında Türkiye Prezidenti Suleyman Demirel zamanında başlanğan Qırımda sürgünlikten qaytqanlar içün mesken qurucılığı programmasını devam ettirmek kelişildi. Bunıñ kibi de Qırımda milliy mektepleriniñ sayısını arttıruvğa da yardım berilecegi işandırıldı. Cümleden, Türkiye Baş naziri TİKA Prezidentine Aqmescitniñ Fontanı qasabasındaki qurujılığına 27 million grivnâ kerek olğan milliy mektep binasını sentâbr 1-ge qadar teslim etmek ve Bağçasaray şeerinde mektep quruv boyunca esas işlerni becermek avale etildi. TİKA Prezidenti bu avaleler, eger de Ukraina akimiyeti tarafından iç bir türlü mania olmasa, vaqtında eda etilecegine söz berdi. Bu munasebetnen TİKA Prezidenti Ukraina iqtisadiyat nazirligi çoq yıllar devamında TİKAnıñ leyhalarını tasdiqlavnı kerige çekkeni ve sebepten bir çoq işler, em yalıñız sürgün etilgenlerge degil de, Ukrainanıñ bir sıra regionlarında yardım işleri yapılmay qalğanını da bildirip, bu aqta Baş nazir Ukraina Prezidentinden körüşkende aytmasını rica etti.

Yanvar 25 künü Milliy Meclis reisi Kiyevdeki “Ukrainskiy dom” ofisinde Recep Tayip Erdoğan ve Viktor Yanukoviçniñ bivasta iştirakinde keçken türk-ukrain biznes-forumında qatnaştı. Türkiye ticaret palataları ve mal birjaları birleşmesiniñ prezidenti Rifat Hisarcikoğlunıñ ricası ile çıqışta bulundı. Körüşüvde Türkiye Baş naziri Recep Tayip Erdoğan da çıqış yaptı.