Refat Çubarov ve Mustafa Cemilev İlham Aliyevnen körüştiler

12.04.2025

Qırımtatar Milliy Meclisiniñ reisi Refat Çubarovnıñ Facebook saifesinde bildirgenine köre, şu künleri Türkiyede olıp keçken Antalya diplomatik forumı çerçivesinde o ve Mustafa Cemilev Azerbaycan Cumhuriyetiniñ Prezidenti İlham Aliyevnen körüşip, Ukrayina topraq bütünligi ve suverenitetine qol tutqanı içün teşekkür bildirdiler.

Malüm olğanı kibi, çiçek ayınıñ  9-nda Azerbaycan prezidenti İlham Aliyev Bakıdaki ADA Universitetinde keçirilgen “Yañı dünya tertibine” halqara forumında çıqışta bulunıp, şunı bildirdi:

“Birinciden, Rusiye ve Ukrayina arasındaki cenkke dair nazar noqtamız aqqında: biz er vaqıt Ukrayinanıñ topraq bütünligi ve suverenitetine qol tuta edik, qol tutamız ve qol tutmağa devam etecekmiz. İşğal ve topraq bütünligimizniñ bozuluvından zarar körgen bir memleket olaraq, biz, elbette, bu vaziyetni yahşı añlaymız. Şunıñ içün, er birinden sorasañız, olar: “Biz cenkniñ birden bitmesini isteymiz” derler. Ebet, biz de isteymiz. Amma esas meselesi – bunı nasıl yapmaq ve bu muvaqqat ateş toqtatıluvı olacaqmı ya da yoq?

İşğal etilgen çatışuv sıñırına barışıq yapıcılar kelseler, demek ki, siz öz toprağıñıznen vedalaşmaq kereksiñiz. İç bir memleket, eñ azından menim añlağanıma köre, topraq bütünligi meselesinde uzlaşmağa razı olmaz. Şunıñ içün Ukrayinanıñ barışıq içün halqara seviyede tanılğan topraqlarını feda etmege razı olacağını beklemek, menimce, adaletsiz ve kerçek degil.

Cenkniñ toqtatıluvı aqqında güzel şeyler aytmaq bir şey, lâkin biraz ileri ketmek ve, belki de, yaqın keçmişte cenkten zarar körgenlerden tınç barışıq içün kerek olğan añlaşmalar aqqında soramaq – başqa şeydir.

Men şahsen, realist olaraq, eñ yaqın kelecekte Ukrayina ve Rusiye arasında barışıq körmeyim. Rusiye işğal etilgen topraqlarnı Rusiye qısmı olaraq ilân etti. Olar bunı nasıl red ete bileler? Ukrayina, bütün dünya kibi, bu işğal etilgen topraqlarnı Ukrayinanıñ qısmı olaraq saya, Azerbaycan da olarnı Ukrayinanıñ qısmı olaraq saya. Olar nasıl qurban bere bileler ve: yoq, bu Ukrayinanıñ bir qısmı degil, dep ayta bileler? Bu olsa, demek ki, men halqara siyaset aqqında bir şey bilmem”.