Zelenskıy AQŞ Kongressinde çıqış yaptı

22 Dekabr 2022

Kelecek sene, Rusiyeniñ Ukrainağa qarşı cenkinde al etici olacaq, dep AQŞ Kongressinde çıqış yapqanda Ukraina prezidenti Volodımır Zelenskıy bildirdi. Qırım.Aqiqat bu aqqında haber berdi.

– Kelecek sene – anda al etici vaqıt olacaq. Ukrain cesareti ve amerika azimkârlığınıñ bizim serbestligimizniñ kelecegini kefil olmalı olacağı vaqıt. Öz qıymetleri içün cenkleşken insanlarnıñ serbestligi, – dep prezident ayttı.

Onıñ sözlerine köre, Rusiye “istese”, bu tecavuznı toqtata bilir.

– Amma siz bizim ğalebemizni yaqınlaştıra bilirsiñiz, men bunı bilem. Ve o, ola bilecek er bir tecavuzğa kösterecek ki, kimse bizim halqımıznıñ sıñırlarını asla bozamaycaq, canavarlıq yapamaycaq ve insanlarnıñ istegine baqmadan olarnı kontrol etemeycek. Tecavuzcı bir devlet olmağa begengen Rusiyeden barışıqqa adımlarını beklemek manasızdır. Ruslılar Kreml hastalığını alâ daa çekeler, – dep Zelenskıy qayd etti.

O qoştı ki, AQŞnıñ prezidentinen körüşüv vaqtında ukrain “barışıq formulası”nı muzakere etti ve Co Bayden bu teşebbüsni destek etti.

Zelenskıy qayd etti ki, “Rusiyeni tecavuzını ne qadar yıqılıcı olğanını duydurmaq içün” AQŞ sanktsiyalarını quvetleştire bilir.

– Siz bizge, bu sebepsiz ve qanunsız cenkni başlatqan er kesni mesüliyetke çekmege yardım ete bilirsiñiz. Bunı yapayıq! Tecavuzcı bir devlet terror ve tecavuz içün cevapkâr olsın ve cenk neticesinde zararnı ödesin. Dünya, Amerika Qoşma Ştatlarınıñ mında olmasını körsin, bilsin!, – dep Zelenskıy ayttı.