Verem hastalığını çekkeni sebebinden Tofik Abdulgazievni azat ettirmege tırışalar

17 Aprel 2024

Qırımtatar siyasiy mabüsi Tofik Abdulgazievniñ verem hastalığını çekkeni sebebinden advokatları, FSVPten adamnı apishaneden azat etmege talap eterek, rus makemesine ariza yolladılar. Bu hastalıq, apishanede üküm müddetini keçirmege mania olğan umumiy hastalıqlar cedvelinde bar.

Çiçek ayınıñ 17-sinde “Qırım birdemligi” mezkür arizanıñ metnini alıp, bu aqqında haber berdi.

Keçken ay Tofik Abdulgazievni reanimatsiyağa alıp ketirdiler. Çiçek ayında verem hastalığından ğayrı, rus ekimleri Tofikniñ başqa hastalıqlarnı çekkenini ögrendiler: eki taraflı pnevmoniya, kiçik sol taraflı gidrotoraks (aq ciğerlerde şingenlik), orta anemiya, bozulğan mitral klapanen birleşken toqumanıñ displaziya sindromı (yürek hastalığı), hronik yürek kemligi, gastrit ve nefrolitaz (büyreklerde taşlar).

Advokatları siyasiy mabüs üküm müddetini apishanede keçirmeyip, onı azat ettirmesini isteyler ve acelen bu talapnamemi makemede baqtırmağa tırışalar.

Abdulgazievniñ apayı Aliye Kurtametovanıñ sözlerine köre, aqayına baqmaq kerek ve öz başına tedaviylenmez.

“Epimiz raatsızlanamız. Böyle diagnoznen Tofik daa büyük tedaviylev, baqım ve mahsus aşqa ihtiyac duya, amma apishane şartlarında bu olmaz. Onıñ sağlıq alı aqqında tek bilgenim şey, o normaldir. Reanimatsiyadan daa yaramay şartlarda hastahanede yata”, — dep qadın añlattı.